एजेन्सी – कतार विश्वकप २०२२ को युरोपियन छनोटको दोस्रो राउन्डको खेलमा स्पेनले जर्जियामाथि उसकै मैदानमा पूनरागमन जित निकालेको छ ।

स्पेनले एक गोलले पछि परेको अवस्थामा २–१ को पूनरागमन जित निकालेको हो । स्पेनको जितमा फेरान टोरेस र ड्यानियल ओल्मोले गोल गरे । भिचाको गोल सान्तवना बन्यो । विश्वकप छनोटमा स्पेनको यो पहिलो जित हो । यसअघि स्पेनले पहिलो खेलमा ग्रीससँग १–१ गोलको बराबरी खेलेको थियो ।

जर्जियामा आइतबार राति भएको खेलमा घरेलु टोलीले खेलको ४४औं मिनेटमा भिचाको गोलबाट अग्रता लिएको थियो । उनले ओटारको पासमा गोल गरेका थिए । एक गोलले पछि परेको स्पेनले ५६औं मिनेटमा बराबरी गोल फर्कायो । फेरान टोरेसले जोर्डी अल्वाको पासमा गोल गरेका थिए ।

इन्ज्युरी समयका थप गरिएको दोस्रो मिनेटमा ड्यानियल ओल्मोले अल्वाकै पासमा गोल गर्दै स्पेनलाई २–१ को जित दिलाए । इन्ज्युरी समयको थप गरिएको चौथो मिनेटमा घरेलु टोली जर्जिया १० खेलाडीमा समेटियो । लिभान सेन्जेलिया रातो कार्ड खादै मैदानबाट बाहिरिए ।

जितसँगै स्पेन समूह ‘बी’ मा २ खेलबाट ४ अंक जोडेर दोस्रो स्थानमा रहेको छ । शीर्षस्थानको स्वीडको ६ अंक छ । पराजित ग्रीस १ अंक जोडेर तेस्रो स्थानमा रहँदा जर्जिया र कोसोभोले अंकको खाता खोल्न सकेको छैन ।

यही समूहको अर्काे खेलमा स्वीडेनले कोसोभोमाथि ३–० को सहज जित हात पारेको छ । स्वीडेनको जितमा लुडविग अगस्टिन्सन, एलेक्सान्डर इसाक र सेवास्टिन लार्सनले गोल गरे । इन्ज्युरी समयमा बर्नाड बेरिसा दोहोरो पहेँलो कार्ड खादै मैदानबाट बाहिरिएपछि कोसोभो १० खेलाडीमा समेटिएको थियो ।