काठमाडौं (हाम्रो खेलकुद) – नेपाली राष्ट्रिय फुटबल टोलीका कप्तान किरण चेम्जोङलेले पूर्व कप्तान तथा सफल खेलाडी विराज महर्जनलाई उपाधिसहित बिदाई गर्न पाउँदा खुसी लागेको बताएका छन् ।

दशरथ रंगशालामा सोमबार साँझ फाइनलमा बंगलादेशलाई २–१ गोल हराउँदै नेपालले थ्री नेसन्स कप फुटबल मैत्रीपूर्ण अन्तर्राष्ट्रिय फुटबल उपाधि जितेको थियो । नेपाली फुटबलका एक सफल कप्तान तथा खेलाडी विराजले बंगलादेशविरुद्ध फाइनल खेलेसँगै अन्तर्राष्ट्रिय फुटबलबाट औपचारिक रुपमा सन्यास लिएका छन् । खेल जीवनमा विराजको त्यो ७३ औं खेल हो । कुनै पनि नेपाली खेलाडीको त्यो सर्वाधिक क्याप हो ।

पोष्ट म्याच कन्फ्रेन्समा सँगै रहेका विराजलाई अंगालो हाल्दै किरणले भने, हामीले विराजलाई प्रतियोगिता सुरु हुनु अघि नै भनेका थियौं । यो उपाधि जितेर तिम्रो लागि समर्पण गर्नेछौं । त्यसमा सफल भयौं खुसी छौं । भविष्यमा घरेलु फुटबलका लागि सफलताको कामना ।’ थ्री नेसन्स कप जितेपछि किरणले फेरि एक पटक साफ च्याम्पियनसिप जित्ने इच्छा दोहोराए ।

‘सबै समर्थकलाई धन्यवाद । नोभेम्बरमा बंगलादेशसँग उसकै मैदानमा खेलेको टोली र अहिले यहाँ खेलेको टोलीमा धेरै फरक छ । त्यतिबेला हामी पूर्ण रुपमा फिट थिएनौं, किरणले उपाधि जितेपछि भने, टोलीले धेरै राम्रो खेलेको छ । युवा र डेब्यू खेलाडीमा धेरै राम्रो सम्भावना देखेको छु । यसरी नै निरन्तर प्रशिक्षण गर्दै जाने हो भने साफ च्याम्पियनसिप मात्रै नभई एसियन कप पनि टाढा छैन’ ।

नेपाली टोलीका प्रशिक्षक बालगोपाल महर्जनले यो जितको श्रेय टिम सहयात्री र समर्थकलाई दिएका छन् । ’उपाधिको श्रेय टिम सहयात्री र समर्थकलाई जान्छ । मैले पहिला पनि भनेको थियो । लिगको खेलमा भन्दा फाइनल फरक हुने छ । योजना अनुसार सफल भएका छौं । हामी सफल भयौं । खुसी र सन्तुष्ट छु । विश्वकपको तयारीमा पनि यसरी नै जानेछौं’, प्रशिक्षक महर्जनले भने ।

एक गोल नगरी अघि बढेको नेपालले फाइनलमा सानदार प्रदर्शनका साथ उपाधि जितेको हो । नेपालले पहिलो हाफमा २–० को अग्रता लिएको थियो । १८औं मिनेटमा सन्जोक राईले गोल गदै नेपाललाई १–० को अग्रता दिलाए । सुनिल बलको कर्नरमा बंगलादेशका गोलकिपरले पन्च गरे भने अर्का रक्षकले हेड गरे । त्यसबाट प्राप्त बलमा सन्जोकले डि बक्सभित्रबाट गरेको प्रहार गोलमा परिणत भएको थियो ।

४२ औं मिनेटमा विशाल राईले गोल गर्दै टोलीलाई पहिलो हाफम २–० को अग्रता दिलाए । रन्जित धिमालले दिएको बललाई सन्जोकले सटिक पास दिएपछि विशालले वान भर्सेस वानको अवस्थामा उत्कृष्ट फिनिस गरेका थिए । बंगलादेशलाई ८२ औं मिनेटमा महबुबुर रहमानले गोल गर्दै २–१ को अवस्थामा पुर्याएका थिए ।