एजेन्सी – इंग्लिस प्रिमियर लिगको शीर्षस्थानमा रहेको म्यानचेस्टर सिटी १० खेलाडीमा समेटिएको लिड्ससँग स्तब्ध बनेको छ । सिटी घरेलु मैदानमा १० खेलाडीमा समेटिएको लिड्सँग २–१ ले स्तब्ध बनेको हो ।

सिटीलाई स्तब्ध पार्न स्टुआर्ट डालासले दुई गोल गरे । घरेलु टोलीका फेरान टोरेसले एक गोल फर्काए । इतिहाद स्टेडियममा शनिबार राति भएको खेलमा पाहुना टोली लिड्सले खेलको ४२औं मिनेटमा स्टुआर्ट डालासको गोलबाट अग्रता लिएको थियो । उनले प्याटिक बामफोर्डको पासमा गोल गरेका थिए । पहिलो हाफको इन्ज्युरी समयमा लिड्स १० खेलाडीमा समेटिन पुग्यो ।

गाब्रियल जेससमाथि फल गरेपछि रेफ्रीले भिएआरको सहायता लिदै लियाम कुपरलाई रातो काडै देखाउँदै मैदान बाहिर पठाउदा लिड्सले दोस्रो हाफमा १० खेलाडीमा खेलेको थियो । ७६औं मिनेटमा फेरान टोरेसले गोल गर्दै खेललाई १–१ गोलको बराबरीमा ल्याए ।

उनले बर्नाडो सिल्भाको पासमा गोल गरेका थिए । इन्ज्युरी समयको थप गरिएको पहिलो मिनेटमा स्टुआर्ट डालासले गोल गर्दै सिटीलाई २–१ ले स्तब्ध पारे । ७१ प्रतिशत बल पोसेसन राखेपनि सिटीले जित निकाल्न सकेन ।

यो हारसँगै सिटी ३२ खेलबाट ७४ अंक जोडेर शीर्षस्थानमा यथावत रहँदा आफ्नो शीर्षतालाई बढाउन सकेन । सिटी दोस्रो स्थानको म्यानचेस्टर युनाइटेडभन्दा १४ अंकले अघि छ । युनाइटेडले दुई खेल कम खेलेको छ । लिड्स ४५ अंक जोडेर नवौं स्थानमा रहेको छ ।