काठमाडौं (हाम्रो खेलकुद)– अखिल नेपाल फुटबल संघ (एन्फा) को कात्तिक ८ मा हुने भनिएको निर्वाचनका विषयमा पाटन उच्च अदालतमा आज छलफल हुँदैछ ।
एन्फाका पूर्व महासचिव लोकबहादुर शाही र पूर्व फिफा सहायक रेफ्री विनोद केसीले दिएको रिटमाथि असोज १४ गते न्यायधिश प्रेमराज कार्कीको एकल इजालसले निर्वाचन प्रकृया कात्तिक ५ गतेसम्मका लागि स्थगित गर्न अन्तरिम आदेश दिएको छ । उच्च अदालतले छलफलका लागि आज दुवै पक्षलाई बोलाएको छ ।
एन्फा निर्वाचन कमिटीले कात्तिक ८ गते रिक्त अध्यक्ष र उपाध्यक्ष पदका लागि निर्वाचन मिती तोकेको थियो । तत्कालिन अध्यक्ष गणेश थापालाई फुटबलको सर्वोच्च निकाय फिफाले आर्थिक अनियमितता गरेको आरोपमा १० वर्षे प्रतिबन्ध लगाएपछि अध्यक्षको पद रिक्त रहेको थियो । त्यस्तै उपाध्यक्ष तथा तत्कालिन कार्यवाहक अध्यक्ष ललितकृष्ण श्रेष्ठको करेन्ट लागेर मृत्यु भएपछि उपाध्यक्ष पदि पनि रिक्त थियो ।
अध्यक्षमा कार्यवहाक अध्यक्ष नरेन्द्र श्रेष्ठ र उपाध्यक्ष कर्मा छिरिङ शेर्पाको उम्मेदवारी परेको छ । त्यस्तै उपाध्यक्षमा उपेन्द्रमान सिंह, दीपक खाती र मणी कुँवरले उम्मेदवारी दिएका छन् ।
एन्फाले छलफल अघि नै मुद्दा फिर्ता गराउने गरि पहल गरेको समेत बुझिएको छ ।
