काठमाडौं (हाम्रो खेलकुद) – धनगढी एफसीले नेपाल सुपर लिग (एनएसएल) का लागि नाइजेरियन फरवार्ड आफिज ओलावाले ओलाडिपोलाई अनुबन्ध गरेको छ ।

धनगढीले बिहीबार ओलावालेलाई अनुबन्धित गरेको र उनी नेपाल आइपुगेको जनाएको छ । उनको सम्झौता रकम खुलाइएको छैन । धनगढीले बिहीबार नै नेपाली राष्ट्रिय टिमका कप्तान तथा गोलरक्षक किरण चेम्जोङलाई आइकोनिक खेलाडी र युगल किशोर राईलाई प्रशिक्षकको रुपमा सार्वजनिक गरेको थियो ।

राष्ट्रिय टोलीका मिडफिल्डर विशाल राई मार्की खेलाडी रहेको धनगढीमा किरण र ओलावालेको टा्ेली थप मजवुत देखिएको छ । ओलावाले नेपाली फुटबलमा चर्चित नाम हुन् । उनले ‘ए’ डिभिजन लिग क्लब थ्रीस्टार, मनाङ, मछिन्द्र, आरसिटीबाट खेलिसकेका छन् । यस्तै उनले भारत र बंगलादेशको शीर्ष लिगसमेत खेलिसकेका छन् ।

नेपाल स्पोर्टस एण्ड इभेन्ट म्यानेजमेन्टले पहिलो पटक आयोजना गर्न लागेको फ्रेन्चाइज फुटबल एनएसएल वैशाख ११ देखि जेठ १ गतेसम्म सञ्चालन हुनेछ । लिगमा विराटनगर सिटी एफसी, काठमाडौं रेजर्स, ललितपुर सिटी एफसी, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

धनगढी टिम

गोलरक्षक – टेकेन्द्र थापा र किरण चेम्जोङ (आइकोनिक खेलाडी)

डिफेन्डर – अशोक खवास, विवेक बस्नेत, दिनेश राजवंशी, निराजन महर्जन, निशान खड्का, युद्ध शाही

मिडफिल्डर – विशाल राई (मार्की खेलाडी), पुजन उपरकोटी, रुपेश केसी, सौजन याख्खा राई, योगेश गुरुङ

फरवार्ड – विजय श्रेष्ठ, दर्शन गुरुङ, टंक बस्नेत, आफिज ओलावाले (विदेशी खेलाडी)