एजेन्सी – स्पेनिस ला लिगाको शीर्षस्थानमा रहेको एट्लेटिको म्याड्रिडले रेलिगेसन जोनको पुछारमा रहेको एइवरमाथि ५–० को सानदार जित निकालेको छ ।

घरेलु मैदानमा वान्डा मेट्रोपोलिटानोमा आइतबार राति भएको खेलमा एट्लेटिकोको फराकिलो जितमा एन्जल कोरेरा र मार्काेस लोरेन्टेले समान दुई गोल गर्दा यान्निक कारास्को एक गोल गरे ।

पहिलो हाफमा दुई तथा दोस्रो हाफमा तीन गोल सम्भव भएको थियो । खेलको सुरुवात देखि नै एइवरलाई दवावमा राखेको एट्लेटिकोले गोलको लागि पहिलो हाफको अन्त्यतिरको समय कुर्नुपरेको थियो ।

४२औं मिनेटमा हेक्टर हेरेराको पासमा एन्जल कोरेराले गोल गर्दै एट्लेटिकोको गोलको खाता खोलेको थियो । ४४औं मिनेटमा यान्निक कारास्कोको पासमा एन्जल कोरेराले गोल गर्दै एट्लेटिकोलाई पहिलो हाफमा २–० को अग्रता दिलाए । ४९औं मिनेटमा यान्निक कारास्कोले सउल निग्वेजको पासमा गोल गरेपछि एट्लेटिको ३–० ले अघि बढ्यो ।

५४औं मिनेटमा मार्काेस लोरेन्टेले एन्जल कोरेराको पासमा गोल गर्दै एट्लेटिकोलाई फराकिलो जिततर्फ अग्रसर गराए । ६८औं मिनेटमा मार्काेस लोरेन्टेले यान्निक कारास्कोको पासमा व्यक्तिगत दोेस्रो तथा टोलीका लागि पाँचौ गोल गर्दै एट्लेटिकोलाई ५–० को फराकिला जित दिलाए ।

फराकिलो जितसँगै शीर्षस्थानमा रहेको एट्लेटिकोको ३१ खेलबाट ७० अंक पुगेको छ । दोस्रो स्थानमा रहेको एक खेल कम खेलेको रियल म्याड्रिडको ६६ अंक छ । एट्लेटिकोसँगको हारसँगै रेलिगेसनको सम्भावना बढेको एइवर ३१ खेलबाट २३ अंक जोडेर पुछारमा रहेको छ ।