काठमाडौं (हाम्रो खेलकुद)- यसै साता सुरु हुने पहिलो फ्रेन्चाईज लिग खुकुरी नेपाल सुपर लिग(एनएसएल) मा निभियाको बल प्रयोग हुने भएको छ । एनएसएलमा आधिकारिक बल पार्टनरका रुपमामा निभिया प्रयोग हुने मंगलबार एनएलएलको आयोजना नेपाल स्पोर्टस् एन्ड म्यानेजमेन्टकी अध्यक्ष आश्रयता कार्की चौधरी र निभियाका नेपाल प्रतिनिधि किशोर थापरले सम्झौता पत्रमा हस्ताक्षर गरेका छन् ।

शनिबार देखि दशरथ रंगशालामा सुरु हुने एनएसएलमा निभियाको ‘अष्टांग’ बल प्रयोग हुनेछ। यो विश्व फुटबलको सर्वोच्च संस्था फिफाको प्रो क्याटेगोरी सर्टिफाइड फुटबल हो। राम्रोसँग उफ्रिने, पानी सोस्ने, बाटुलो हुनुपर्ने लगायतका प्यारामिटर गुणस्तर प्रमाणित बल फिफाको मापदण्डभित्र पर्छ। यो बलले उक्त मापदण्ड पूरा गरेको बताइएको छ ।

स्विट्जरल्यान्डको फिफाको प्रयोगशालामा यसको परीक्षण भएको थियो भने अन्तर्राष्ट्रिय खेलमा प्रयोग योग्य बल हो। चर्चित इन्डियन ब्रान्ड निभियाले दशकौँदेखि फुटबल प्रवर्द्धनमा सहकार्य गर्दै आएको जनाएको छ। यसअघि सन् २०१३ मा नेपालले आयोजना गरेको साफ च्याम्पियनसिपमा पनि पनि निभिया नै अफिसियल बल पार्टनर थियो।त्यतिबेला कम्पनीले निभिया सिम्बोलो फुटबल उपलब्ध गराएको थियो।

निभियाका मेनेजिङ डाइरेक्टर राजेश खरबन्दले अष्टांग बल नयाँ संस्करणको व्यावसायिक फुटबल भएको बताए। खरबन्दले खेललाई अर्को स्तरमा लैजानेमा विश्वस्त रहेको बताए। निभायका बल भारतमा तयार पारिन्छ । ८ प्यानेलमा बनेको बलको सिम लेंग्थ २३ प्रतिशतले घटाइएको छ। परम्परागत बलमा ३२ प्यानेल हुन्छ। यसले प्रतिस्पर्धी खेलमा सहयोग हुने कम्पनीले जनाएको छ।

७ टोलीको सहभागितामा एनएलएल आयोजना हुँदैछ । कोरोनाको महामारी बढ्दै गएपछि सरकारले दर्शकसहित प्रतियोगिता आयोजना गर्न बन्देज लगाएको छ । अब विना दर्शक एनएसएल सञ्चालन हुनेछ ।