एजेन्सी – इटालियन सिरी ‘ए’ मा शीर्षस्थानमा रहेको इन्टर मिलानले झिनो जित निकाल्दा युभेन्टस हारबाट जोगिएको छ । इन्टरले घरेलु मैदानमा हेलास भेरोनामाथि १–० को झिनो जित निकाल्दै उपाधि होडलाई थप मजवुत बनाएको हो ।

इन्टरको ३३ खेलबाट ७९ अंक पुगेको छ । शीर्षस्थानको इन्टर दोस्रो स्थानमा रहेको एटलान्टाभन्दा ११ अंकले अघि छ । दोस्रो स्थानको एटलान्टाको ६८ तथा तेस्रो स्थानको एसी मिलान र युभेन्टसको समान ६६ अंक छ । सिरी ‘ए’ मा अब ५ राउन्डको खेल बाँकी रहँदा इन्टरलाई च्याम्पियन बन्न दुई जितको आवश्यकता रहेको छ ।

आइतबार राति भएको खेलमा इन्टरको जितमा माटियो डार्मिएनले दोस्रो हाफमा गरेको गोल नै निर्णायक बन्यो । उनले ७६औं मिनेटमा अचरफ हाकिमीको पासमा निर्णायक गोल गरेका थिए ।

सिरी ‘ए’ कै अर्काे खेलमा साविक विजेता युभेन्टस फियोरेन्टिनासँगको हारबाट जोगिएको छ । फियारेन्टिनाका डुसान भ्लाहोभिकले गोल गर्दा युभेन्टसका अल्भारो मोराटाले बराबरी गोल फर्काएका थिए । दोस्रो हाफमा मैदान प्रवेश गरेका मोराटाले मैदान प्रवेश गरेको केही सेकेन्डमै गोल गरेका थिए । बराबरीपछि युभेन्टस ३३ खेलबाट ६६ अंक जोडेर चौथो स्थानमा रहँदा फियोरेन्टिना ३४ अंक जोडेर १४औं स्थानमा रहेको छ ।
सिरी ‘ए’ कै अर्काे खेलमा एटलान्टाले १० खेलाडीमा समेटिएको बोलोग्नामाथि ५–० को सानदार जित हात पारेको छ । एटलान्टाको सानदार जितमा रुस्लान मालिनोभ्स्की, लुइस मुरिएल, डुभान जापटा, रेमो फ्रिउलेर र एलेक्सी मिरानचुकले गोल गरे ।

जेडी स्काउटेन सिधै रातो कार्ड खादै मैदानबाट बाहिरिएपछि बोलोग्ना ४९औं मिनेटमा १० खेलाडीमा समेटिएको थियो । १० खेलाडीमा समेटनु अघि एटलान्टाले दुई गोल गर्दा त्यसपछि तीन गोल थपेको थियो । जितपछि एटलान्टा ३३ खेलबाट ६८ अंक जोडेर दोस्रो स्थानमा उक्लदा पराजित बोलोग्ना ३८ अंक जोडेर १२औं स्थानमा रहेको छ ।