काठमाडौं (हाम्रो खेलकुद)– अखिल नेपाल फुटबल संघ (एन्फा) ले तासी घलेलाई आफ्नो मानार्थ अध्यक्ष मनोनित गरेको छ । एन्फा अध्यक्ष र एक उपाध्यक्षको चयनका लागि लागि सोमबार हुने निर्वाचनअघि आइतबार बसेको केन्द्रिय कार्यसमितिको बैठकले घलेलाई सर्वसम्मत मानार्थ अध्यक्ष मनोनित गरेको थियो । कार्यसमितिको निर्णयलाई सोमबार बस्ने साधारण सभाले पास गरेपछि घले मानार्थ अध्यक्ष बन्नेछन् ।
लक्ष्मी हुन्डाई मनाङ मस्र्याङ्दी क्लबका तर्फबाट एन्फा साधारण सभाका लागि मताधिकार समेत भएका घलेले सुरुमा एन्फा अध्यक्षमा उम्मेदवारी दिने सार्वजनिक गरेका थिए । एन्फा अध्यक्षको उम्मेदवारीका लागि पाँच प्रस्तावक र समर्थक राख्नुपर्ने प्रावधानका चर्को आलोचक हुन् । झन्डै २० बर्षपछि एन्फामा घलेको पूनरागमन हुँदैछ । उनी एन्फाको उपाध्यक्ष र केही समय कार्यवहाक अध्यक्ष समेत भइसकेका छन् । उनी नेपाल गल्फ संघका महासचिव पनि हुन् । एन्फा कार्यसमितिले सोमबार हुने साधारण सभामा प्रस्तुत गर्ने एन्जेडा समेत पारित गरेको थियो ।
