एजेन्सी – स्पेनिस ला लिगामा एट्लेटिको म्याड्रिडले रेलिगेसन जोनमा संघर्ष गरिरहेको इल्चेलाई उसकै मैदानमा १–० को झिनो जित निकाल्दै शीर्षस्थानमा ५ अंकको अग्रता लिएको छ ।

जितसँगै एट्लेटिकोले दोस्रो र तेस्रो स्थानमा रहेको रियल म्याड्रिड र बार्सिलोनालाई ५ अंकले तथा चौथो स्थानको सेभियालाई ६ अंकले पछि पार्दै उपाधि जित्ने सम्भावनालाई थप बलियो बनाएको छ । एट्लेटिकोको ३४ खेलबाट ७६ अंक पुगेको छ । एक खेल कम खेलेका रियल र बार्सिलोनाको ७१ अंक छ । चौथो स्थानमा रहेको सेभियाको ७० अंक छ ।

ला लिगामा अब चार राउन्डको खेल बाँकी रहँदा ला लिगाको उपाधि होड निकै रोमाञ्चक र प्रतिस्पर्धात्मक बनेको छ । इल्चेमा शनिबार राति भएको खेलमा एट्लेटिकोको जितमा पहिलो हाफमा मार्काेस लोरेन्टेले गरेको गोल नै निर्णायक बन्यो । उनले २४औं मिनेटमा यान्निक कारस्कोको पासमा गोल गरेका थिए ।

त्यसअघि १६औं मिनेटमा लुइस सुआरेजले गोल गरेपनि अफसाइड ठहरिदा उनको गोलले मान्यता पाएन । इन्ज्युरी समयको थप गरिएको पहिलो मिनेटमा इल्चे पेनाल्टीमा चुक्दा पराजित हुन पुग्यो । रोड्रिग्वेजको फ्रिकिकमा पाब्लो पियाटीको प्रहार मार्काेस लोरेन्टेको हातमा लागेपछि रेफ्रीले इल्चेलाई पेनाल्टी प्रदान गरेको थिए ।

तर फिडेल चाभेसको पेनाल्टी पोस्टमा लागेर फर्कदा रिवाउन्डमा डानी काल्भोले प्रयास गरेपनि जान ओब्लाकले बराबरी टारे । हारपछि इल्चे ३४ खेलबाट ३० अंक जोडेर रेलिगेसन जोनको १८औं स्थानमा रहेको छ ।