एजेन्सी – बर्खास्तीमा परेको दुई साता नबित्दै पोर्चुगिज प्रशिक्षक जोसे मौरिन्हो इटालियन क्लब एएस रोमाको मुख्य प्रशिक्षकमा नियुक्त भएका छन् । सिरी ‘ए’ क्लब रोमाले मंगलबार मौरिन्होलाई तीन वर्षको लागि मुख्य प्रशिक्षकमा नियुक्त गरेको हो ।

सम्झौता अनुसार मौरिन्हो सन् २०२४ सम्म इटालीमा हुनेछन् । योसँगै मौरिन्हो सन् २०१० पछि इटाली फर्किएका छन् । मौरिन्हो २००८–१० मा दुई वर्ष इन्टर मिलानको प्रशिक्षक रहेका थिए । मौरिन्होको दुई वर्षे प्रशिक्षणमा इन्टर मिलानले ट्रेवल उपाधि (सिरी ‘ए’, कोपा इटालिया र च्याम्पियन्स लिग) जितेका थिए ।

इन्टर मिलान छाडेपछिको ११ वर्षको अवधिमा मौरिन्होले स्पेनिस क्लब रियल म्याड्रिड, इंग्लिस क्लब चेल्सी, म्यानचेस्टर युनाइटेड र टोटेनहम हटस्परको प्रशिक्षण सम्हालेका थिए । रोमाले पाउलो फोन्सेकाको स्थानमा मौरिन्होलाई मुख्य प्रशिक्षक चयन गरेको हो । मौरिन्होको आगमनसँगै पाउलोले यस सिजनको अन्त्यसँगै क्लब छाड्ने छन् । मौरिन्होले नयाँ सिजनबाट रोमाको प्रशिक्षण सम्हाल्ने छन् ।

५८ वर्षीय मौरिन्हो गत अप्रिल १९ मा इंग्लिस प्रिमियर लिग क्लब टोटेनहम हटस्परबाट बर्खास्तीमा परेका थिए । क्लबले यस सिजन खराब प्रदर्शनलाई निरन्तरता दिएपछि टोटेनहमले मौरिन्होलाई बर्खास्त गरेको थियो ।

रोमा लिगको सातौं स्थानमा रहेको छ । युरोपा लिगको सेमिफाइनलमा पुगेको छ । सेमिफाइनलको पहिलो लेगमा रोमा इंग्लिस क्लब म्यानचेस्टर युनाइटेडसँग ६–२ ले पराजित भएको थियो । दोस्रो लेग रोमाको मैदानमा बिहीबार राति हुदैछ । तर, यि खेलमा मौरिन्हो टचलाइनमा हुनेछैनन् ।