काठमाडौं (हाम्रो खेलकुद) – नेपाली राष्ट्रिय लिग क्लब झापा ११ भारतको सिक्किममा जारी ३६ औं अल इन्डिया गभर्नर्स गोल्डकपको उपाधि नजिक पुगेको छ । सिक्किमको गान्तोकस्थित पाल्जोर रंगशालाको एस्ट्रो टर्फमा सोमबार भएको झापाले स्थानिय गान्तोक हिमालयन स्पोर्टिङ क्लबलाई १–० ले हराउँदै फाइनलमा पुगेको हो । प्रतिस्पर्धात्मक खेलमा नरेन्द्रमणि लिम्बुले इन्जुरी समयमा गरेको गोल नै खेलको निर्णायक बन्यो ।
झापा पहिलो सहभागितामै गभर्नर्स गोल्डकपको फाइनल पुग्न सफल भएको छ । उक्त प्रतियोगितामा नेपालका चर्चित क्लब लक्ष्मी हुन्डाई मनाङ मस्र्याङ्दी, रुस्लान थ्री स्टार क्लबले पटक पटक सहभागिता जनाएको थिए । मनाङले यसपटक अन्तिम समयमा प्रतियोगितबाट नाम फिर्ता लिएको थियो ।
अब झापाले फाइनलमा मोहमडन स्पोर्टिङ क्लब र स्थानिय सिक्किम आक्रमण फुटबल क्लबमध्ये एकसँग प्रतिस्पर्धा गर्नेछन् । यी दुईबीचको सेमिफाइनल मंगलबार हुँदैछ । भारतको सेब केरलालाई ४–१ लाई हराउँदै अघि बढेको झापाले क्वार्टरफाइनलमा साविक विजेता समेत रहेको ओएनजिसी मुम्बईलाई टाइब्रेकरमा ४–३ ले हराएको थियो ।
