काठमाडौं (हाम्रो खेलकुद) – क्यामरुनी फरवार्ड मेसौके ओलुमोउको ह्याट्रिक मद्दतमा काठमाडौं रेजर्सले खुकरी नेपाल सुपर लिग (एनएसएल) मा विराटनगर सिटी एफसीमाथि पूनरागमन जित निकाल्दै प्ले अफमा पुग्न सफल भएको छ ।

काठमाडौंले २–० ले पछि परेको अवस्थामा पूनरागमन गर्दै विराटनगरमाथि ५–४ को रोमाञ्चक जित निकालेको हो । काठमाडौंको बाँकी दुई गोल स्टेफन विनोङ समिर र छिरिङ गुरुङले गरे । विराटनगरका पेड्रो मान्जीले दुई तथा एडेलाजा सोमेडे, र कप्तान रन्जित धिमालले समान एक गोल गरे ।

त्रिपुरेश्वरस्थित दशरथ रंगशालामा भएको खेलको छैटौं मिनेटमा नाइजेरियन खेलाडी एडेलाजा सोमेडेको गोल गर्दै विराटनगर सिटी एफसीलाई १–० को अग्रता दिलाए । रन्जित धिमालको क्रसमा एडेलाजाले फ्लिक गर्दै उत्कृष्ट गोल गर्न सफल भएका थिए ।

१४औं मिनेटमा एडेलाजाको हेडरलाई आशिष गुरुङले क्लियर गर्दै बचाए । १६औं मिनेटमा एडेलाजाको क्रसमा पेड्रो मान्जीको ओभर हेड किक पोस्टबाट थोरै माथि बाहिरिदा विराटनगर अग्रता दोब्बर पार्नबाट चुक्यो । २५औं मिनेटमा सुनिल बलको प्रहारलाई गोलरक्षक विकेश कुथुले ब्लक गर्दै विराटनगरको गोल टारे ।

३३औं मिनेटमा पेड्रो मान्जीले गोल गर्दै विराटनगरको अग्रता दोब्बर पारे । सन्तोष तामाङको पासमा मान्जीले अफसाइड बिट ट्याप गर्दै गोलरक्षक विकेश कुथ अघि बढेको अवस्थामा गोल गर्न सफल भएका थिए । आशिष गुरुङले बचाउने प्रयास गरेपनि सफल भएन । ३५औं मिनेटमा मेसौके ओलोउमोउले गोल गर्दै खेललाई २–१ को अवस्थामा ल्याए । उनले गरेको प्रहार गोलरक्षकको हातमा लाग्दै गोलमा परिणत भएको थियो ।

३६औं मिनेटमा मेसौकेले ओलोउमोउले व्यक्तिगत दोस्रो गोल गर्दै खेललाई २–२ गोलको बराबरीमा ल्याए । स्टेफन विनोङ समिरको पासमा विक्रम धिमाललाई बिट गर्दै गरेको प्रहार टप कर्नरमा गोल हुदा होचा कदका गोलरक्षक किशोर गिरीले रोक्ने कुनै अवसर नै पाएनन् । ४१औं मिनेटमा स्टेफेन विनोङ समिरले गोल गर्दै काठमाडौंलाई ३–२ को अग्रता दिलाए । उनले फ्रिकिकमा सिधै गोल गर्न सफल भएका थिए । इन्ज्युरी समयको थप गरिएको तेस्रो मिनेटमा मेसौकेको क्रस पासमा सन्जोक राईको हेडर पोस्ट नजिकैबाट बाहिरियो ।

५२औं मिनेटमा पेड्रो मान्जीको पासमा अशोक थापाको प्रहारलाई गोलरक्षक विकेश कुथुले ब्लक गर्दै काठमाडौंको अग्रतालाई जोगाउँदा विराटनगर अग्रता लिनबाट चुक्यो । ६८औं मिनेटमा मैसोकेको ह्याट्रिक गर्दै काठमाडौंलाई ४–२ ले अघि बढाए । पेनाल्टी बक्समा दुई डिफेन्डरलाई बिट गर्दै सिक्स यार्ड बक्सभित्रबाट गरेको शक्तिशाली प्रहारलाई गोलरक्षक किशोर गिरीले रोक्ने कुनै अवसर नै पाएनन् ।

लिगमा यो पहिलो ह्याट्रिक हो । ७९औं मिनेटमा कप्तान रन्जित धिमालले आर्कबाट सुन्दर गोल गर्दै विराटनगरलाई ४–३ को अवस्थामा ल्याए । उनले सन्तोष तामाङका पासमा आर्कमा बल नियन्त्रणमा लिदै गोल गर्न सफल भएका थिए । ८३औं मिनेटमा छिरिङ गुरुङले गोल गर्दै काठमाडौंको जिततर्फ डो¥याए ।

मैदानको मध्यभागबाट एक्लै बल अघि बढाएका छिरिङले मेसौकेको पासमा उत्कृष्ट फिनिस गरेका थिए । इन्ज्युरी समयको थप गरिएको चौथो मिनेटमा पेड्रो मान्जीले गोल गर्दै खेललाई ५–४ को अवस्थामा ल्याएपनि काठमाडौं विजयी हुन सफल भयो ।

काठमाडौं रेजर्सका विश्वास श्रेष्ठ इमर्जिङ खेलाडी घोषित भए । उनले १० हजार रुपैयाँ हात पारे । काठमाडौंकै मेसौके ओलोमेउ प्लेयर अफ दि म्याच घोषित भए । उनले २५ हजार रुपैयाँ हात पारे ।

जितपछि काठमाडौंको प्ले अफ पुग्ने दोस्रो टोली बनेको छ । यसअघि धनगढीलेले सम्भावना बलियो बनेको छ । काठमाडौं ५ खेलबाट १० अंक जोड्दै दोस्रो स्थानमा उक्लिएको छ । पराजित विराटनगरको प्ले अफ सम्भावना जीवित छ । विराटनगर ७ अंक जोडेर तेस्रो स्थानमा रहेको छ ।

लिगमा शुक्रबार पोखरा थन्डर्स र एफसी चितवनबीच साँझ ५ः३० बजे प्रतिस्पर्धा हुदैछ । लिगमा शीर्ष दुई स्थान हासिल गर्ने टोलीले फाइनल प्रवेशका लागि २८ बैशाखमा खेल्नेछ । यस खेलमा पराजित हुने टोलीले २९ बैशाखमा तेस्रो र चौथो हुने टोलीबीचको विजेतासँग पुनः फाइनल प्रवेशका लागि ३० बैशाखमा खेल्नेछ । फाइनल १ जेठमा हुनेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।