एजेन्सी – स्पेनिस ला लिगाको उपाधि होडमा रहेको क्याटलान क्लब बार्सिलोना र एट्लेटिको म्याड्रिडबीच आज राति प्रतिस्पर्धा हुँदैछ । खेल क्याम्प नोउमा नेपाली समयअनुसार राति ८ बजे हुनेछ ।

घरेलु मैदानमा हुने खेलमा बार्सिलोना एट्लेटिकोलाई हराउँदै शीर्षस्थानमा उक्लने दाउमा हुनेछ । एट्लेटिकोलाई हराउन सके बार्सिलोनाल शीर्षस्थानको एट्लेटिकोलाई १ अंकले तथा दोस्रो स्थानको रियल म्याड्रिडलाई ३ अंकले पछि पार्नेछ । ला लिगाको ३४ खेलमा एट्लेटिकोले ७६ तथा रियल र एट्लेटिकोले समान ७४ अंक जोडेको छ ।

टोलीसँग कप्तान लियोनेल मेस्सी, एन्टोइन ग्रिजमन, जोर्डी अल्वा, पेड्री, सर्जियो बुस्क्वेट्स, फ्रान्की डि योङ, सर्जिनो डेस्ट, क्लेमेन्ट लेङ्लेट, जेरार्ड पिके, रोनाल्ड एराउजो र गोलरक्षक मार्क आन्दर टेर स्टेगन रहेका छन् । सर्जी रोबर्टाे र इलाक्स मोरिवा पनि टोलीमा रहेका छन् ।

यता, शीर्षस्थानमा रहेको एट्लेटिको पनि बार्सिलोनालाई हराउँदै आफ्नो शीर्षता कायम राख्दै उपाधि यात्रालाई थप मजवुत बनाउने लक्ष्यमा हुनेछ ।

टोलीसँग लुइस सुआरेज, मार्काेस लोरेन्टे, यान्निक कारास्को, कोकी, थोमस लेमार, काइरन ट्रिपिएर, मारियो हर्माेसो, जोस जिमिनेज, स्टेफन साभिक र गोलरक्षक जान ओब्लाक रहेका छन् । यस्तै एन्जल कोरेआ, जियोफ्रे कोनडोग्विया, जोआओ फेलिक्स, फिलिपे र सउल निग्वेज टोलीमा छन् ।

यि दुई टोलीको ३२ भेटमा बार्सिलोना १८ खेलमा विजयी भएको छ । १० खेल बराबरीमा सकिदा ४ खेल एट्लेटिकोले आफ्नो पक्षमा पारेको छ । तर, पछिल्लो तीन भेटमा बार्सिलोनाले एट्लेटिकोलाई हराउन सकेको छैन । २०२० जनवरी १० मा भएको स्पेनिस सुपर कपमा बार्सिलोनालाई ३–२ ले हराएयता एट्लेटिको अपराजित छ । त्यसपछि एट्लेटिको र बार्सिलोनाले २–२ गोलको बराबरी खेल्दा पछिल्लो पटक बार्सिलोनालाई १–० ले हराएको थियो ।

सम्भवत यही खेलको नतिजा पनि यस सिजनको ला लिगाको विजेता छिनोफानो गर्न सक्नेछ । तर ला लिगामा अझै तीन राउन्डको खेल बाँकी रहेको छ ।

अन्य खेल :

एलाभेसविरुद्ध लेभान्टे (साँझ ५:४५ बजे)

क्याडिजविरुद्ध हुएस्का (राति १०:१५ बजे)

एथलेटिको विल्वाओविरुद्ध ओसासुना (राति १२:४५ बजे)