एजेन्सी – भौतिक दूरीले मित्रतामा फरक पर्दैन भन्ने विश्व फुटबलका दुई स्टारको भेटघाटबाट प्रष्ट हुन्छ । बार्सिलोनाका लिओनल मेस्सी र एट्लेटिको म्याड्रिडका लुइस सुआरेजले स्पेनिस राजधानी म्याड्रिडमा मंगलबार भेटघाट गर्दै सँगै खाना खाएका छन् ।

सुआरेज सिजनको सुरुवातमा बार्सिलोना छाडेर एट्लेटिको पुगेका थिए । सुआरेजसहितको उच्च प्रदर्शनबाट प्रेरित एट्लेटिको ला लिगा उपाधि नजिक छ । यसै साता सुआरेजले अन्तिम समयमा गोल गर्दा एटलेटिकोले ओसासुनामाथि रोमान्चक जित दर्ता गरेको थियो । दोस्रो स्थानको रियल म्याड्रिडको तुलानामा एट्लेटिकोको उपाधि जित्ने सम्भावना बढी देखिन्छ ।

बार्सिलोना भने पछिल्लो खेलको हारपछि उपाधि दौडबाट बाहिरिएको छ । मेस्सी र सुआरेजबीच उपाधिका विषयमा पनि सामान्य छलफल भएको विश्वास गरिएको छ । मेस्सीले पनि एट्लेटिकोले उपाधि जित्ने आशा राखेको बताएको अनुमान गरिएको छ ।

दिर्घकालिन सम्बन्ध

सुआरेज बार्सिलोनामा हुँदा मैदान बाहिर जस्तै मैदान भित्र पनि मेस्सीसँग उनको तालमेल राम्रो थियो । उनीहरुको प्रदर्शनबाट प्रेरित बार्सिलोनाले सन् २०१५ मा च्याम्पियन्स लिग उपाधि जितेको थियो । अल्भारो मोराटालाई युभेन्ट्स पठाउँदै एट्लेटिकोले सुआरेजलाई भित्राउँदै जोखिम उठाएको थियो ।

सुआरेज पछिल्लो एक दशक यताका उत्कृष्ट फरवार्ड मध्येका एक हुन् । रोनाल्ड कोम्यानलाई बार्सिलोनाले प्रशिक्षक बनाएपछि उनले सुआरेजलाई क्लब छाड्न बाध्य जस्तै पारेका थिए । सुआरेजले एट्लेटिकोका लागि यो सिजन ला लिगामा मात्र २० गोल गरिसकेका छन् ।