एजेन्सी – क्याटलान क्लब बार्सिलोनाले जर्मन क्लब बोरुसिया डर्टमुन्डका नर्वेजियन युवा स्टार एर्लिङ ब्राउट हालान्ड अनुबन्धको दौडबाट हात झिकेको छ ।

पछिल्लो समय बार्सिलोनाले हालान्डलाई अनुबन्ध गर्ने दौडधुप सुरु गरेको थियो । तर आर्थिक समस्या र कप्तान लियोनेल मेस्सीलाई क्लबमै राख्नुपर्ने दवावका कारण बार्सिलोनाले युवा स्टार हालान्ड अनुबन्धको दौडबाट हात झिकेको बुझिएको छ ।

हालान्डका एजेन्ट मिनो राइओला र उनका बुवा अल्फी–इन्जेले गत अप्रिलमा हालान्डको सम्भापवत स्थानान्तरणबारे बार्सिलोनाका पदाधिकारीसँग भेट गरेका थिए । उनको मुल्यपछि बार्सिलोनाका अध्यक्ष जोन लापोर्टाले यो कदम सम्भव नहुने बताएका थिए ।

हालान्ड अनुबन्धको लागि कम्तीमा पनि १५० मिलियन युरो आवश्यकता पर्दछ । त्यसपछि उनको पारिश्रमिक पनि पुरा गर्नुपर्ने हुन्छ । यसका साथै मेस्सीलाई पनि क्लबमै राख्नुपर्ने दवाव छ । अर्थात बार्सिलोनाको अहिलेको प्राथमिकता मेस्सीलाई क्लबमै राख्नु रहेको छ ।

त्यसो हुनका लागि बार्सिलोनाले जेरार्ड पिके, सर्जियो बुस्क्वेट्स, सर्जी रोबर्टाे, जोेर्डी अल्वा र एन्टोइन ग्रिजमनजस्ता प्रभावशाली खेलाडीहरु बेच्नुपर्ने हुन्छ । बार्सिलोनाले यो सिजन हालान्डलाई अनुबन्ध गर्न नसकेपनि अर्काे सिजन पनि प्रयास गर्न सक्नेछ । यस सिजनका लागि भने बार्सिलोनाले फ्री ट्रान्सफरमा सर्जियो अगुएरोलाई भित्र्याउने सम्भावना रहेको छ ।

बार्सिलोना अझै पनि हालान्डलाई नोउक्याम्पमा ल्याउन चहान्छ । र आशा छ कि उनी अर्काे वर्ष डर्टमुन्डमै रहनेछन् । यदि यसो हुन सकेको अवस्थामा उनको रिलिज क्लज ७५ मिलियन युरोमा झर्नेछ । उनलाई अनुबन्ध गर्न सहज हुनेछ । डर्टमुन्डले अर्काे सिजनको लागि च्याम्पियन्स लिगमा स्थान सुरक्षित गरिसकेका कारण पनि क्लबले उनलाई राख्न हरसम्भव प्रयास गर्नेछ ।