एजेन्सी – इडेन हाजार्डले रियल म्याड्रिडका नयाँ प्रशिक्षक कार्लो एन्सेलोटीको आगमनलाई सकारात्मक रुपमालिएका छन् । बेल्जियन विंगरको रियलका पूर्व प्रशिक्षक जिनेदिन जिदानसँग पनि राम्रो सम्बन्ध थियो । उनले सिजनको अन्त्यसँगै मे २७ मा क्लबबाट राजीनामा दिएका थिए ।

अब भने एन्सेलोटीको समयमा व्यक्तिगत रुपमा पनि अझै राम्रो हुने आशा हजार्डले राखेका छन् । ‘रियलमा सबैलाई थाहा छ एन्सेलोटीले के गर्न सक्छन् भन्ने । यहि समूहबाट उनले च्याम्पियन्स लिग जितेका थिए । उनले धेरै खेलाडीलाई चिन्छन् । उनी अनुभवी प्रशिक्षक हुन्,’ हाजार्डले भने, ‘उनलाई यो शहर र यहाँका समर्थकका बारेमा थाहा छ । मलाई लाग्छ हामी मिलेर धेरै गर्न सक्छौं ।’

यपद्दी व्यक्तिगत रुपमा हाजार्ड र एन्सेलोटीको चिनजान भने छैन । ‘म व्यक्तिगत रुपमा त जान्दिन । तर मैले जति पनि उनको बारेमा सुनेको छु ,’ उनले थपे, ‘उनी राम्रो मान्छे हुन् र उनी जित्न चाहन्छन् । हामी पनि त्यहि चाहन्छौं । हामी मिलेर परिवर्तन गर्न सक्छौं । मेरो लागि पनि यो सुखद खबर हो ।’

एन्सेलोटीले प्रिमियर लिग टोली चेल्सी छाडेको अर्को वर्ष उनी त्यहाँ पुगेका थिए । त्यसैले हाजार्ड र एन्सेलोटी पहिलो पटकसँगै हुनेछन् । उनले पूर्व प्रशिक्षक फ्रान्सेली प्रशिक्षक जिदानलाई धन्यवाद दिए । ‘रियलका प्रशिक्षकका रुपमा हरेक दिन उनको वरिपरि रहनु भनेको राम्रो हो,’ उनले अन्त्यमा भने, ‘आफ्नो आदर्शबाट सिक्न पाउनु भन्दा ठूलो अवसर के हुन्छ र ?’