चितवन (हाम्रो खेलकुद) – सिएमजी क्लब संकटा विकास सिल्ड रनिङ सिल्ड फुटबल प्रतियोगिताको उपाधि नजिक पुगेको छ । सहिद स्मारक ए डिभिजन लिग डर्बीमा घरेलु फुटबलको चर्चित क्लबमध्येको एक लक्ष्मी हुन्डाई मनाङ मस्र्याङ्दीलाई शुक्रबार २–१ ले हराउँदै संकटा फाइनल पुगको हो ।

संकटाले आइतबार हुने फाइनलमा अर्को ए डिभिजन टोलीले विभागिय टोली नेपाल आर्मीको सामना गर्नेछ । आर्मी मोरङ फुटबल क्लबलाई हराउँदै बुधबार नै फाइनल पुगिसकेको छ । इन्जुरी समयमा असिमजंग कार्कीको गरेको गोल निर्णायक बनेपछि संकटा अघि बढेको हो । निर्धारित ९० मिनेटको खेल १–१ गोलको बराबरीले खेल बराबरीमै टुंगिने र खेल थप समयमा जाने अनुमान थियो । तर, असिमको गोलले सबैको अनुमानलाई गलत साबित गरिदियो ।

इन्जुरी समयको दोस्रो मिनेटमा पेनाल्टी बक्स नजिक पाएको फ्रिकिकमा अमिसले गोल गरेका थिए । असिम नै खेलको म्यान अफ दी म्याच घोषित भएर १० हजार रुपैयाँ प्राप्त गरे । त्यसअघि ३१ औं मिनेटमा नीराजन खड्काको गोलमा संकटाले अग्रता लिएको थियो । नीराजनको प्रहारमा मनाङका गोलकिपर दीनेश यादवले सही अनुमान गर्न नसकेपछि टोली खेलमा पछि परेको थियो । १–० ले पछि परेको मनाङ आक्रमक रुपमा प्रस्तत भयो, तर टोलीलाई तत्काल सफलता भने मिलेन ।

खेल सकिन १२ मिनेट बाँकी रहँदा अफिज ओलावालेले बराबरी गोल गर्दै टोलीलाई खेलमा फर्काएका थिए । विश्वास श्रेष्ठको कर्नरमा आएको बललाई ओलावालेले पोस्टको दिशा दिएका थिए । आइतबार हुने फाइनलको विजेताले उपाधिसहित ३ लाख रुपैयाँ प्राप्त गर्नेछ । कात्तिक १ गतेदेखि सुरु भएको प्रतियोगितमा तीन भारतीयसहित १५ टोलीको सहभागिता थियो ।