एजेन्सी – क्रिस्टियानो रोनाल्डो कीर्तिमान नै कीर्तिमानको खानी हुन् । यसै साता सुरु हुने युरो कपमा रोनाल्डोले थुप्रै कीर्तिमान बनाउँदै युरोकपकै सर्वकालीन महान खेलाडी बन्न सक्नेछन् ।

यसको सुरुवात १५ जुनमा हंगेरीविरुद्धको खेलबाट सुरुवात हुनेछ । जहाँ पोर्चुगल रोनाल्डोको कप्तानीमा उत्रनेछ । सोही खेलबाट नै रोनाल्डोको नयाँ कीर्तिमानको अर्काे अध्याय पक्कै सुरु हुनेछ । सन् २०१६ मा आफ्नो कप्तानीमा पोर्चुगललाई युरोपेली च्याम्पियन बनाउन महत्त्वपुर्ण भुमिका निर्वाह गरेका ३६ वर्षीय खेलाडीसँग युरोकपको सर्वकालिन महान् खेलाडीको दाबी गर्न सक्ने ठोस तर्कहरु छन् ।

रोनाल्डोको नाममा युरोकपको इतिहासमा सर्वाधिक धेरै खेल खेल्ने कीर्तिमान र छनोटमा सर्वाधिक गोल गर्ने कीर्तिमान छ । यसपटक उनले एक गोलमात्रै गरे भनेपनि युरोकपमा सर्वाधिक गोल गर्ने एक्लो खेलाडी बन्नेछन् । यस युरोकपमा उनले के–कस्ता नयाँ कीर्तिमान कोर्न सक्छन् ? आउनुस् चर्चा गरौं ।

अनवरत गोल

युरो कपको इतिहासमा सर्वाधिक गोल गर्नेको सुचीमा फ्रान्सका मिचेल प्लाटिनी र रोनाल्डो समान ९ गोलसहित संयुक्त रुपमा शीर्षस्थानमा छन् । रोनाल्डोले चार संस्करणमा २१ खेल खेल्दै प्लाटिनीको कीर्तिमानलाई भेट्टाएका हुन् । युरो कपमा चार फरक संस्करणमा गोल गर्ने कीर्तिमान पनि उनको नाममा छ । यता प्लाटिनीले एकै संस्करण १९८४ को युरोकपमा ५ खेल खेलेर ९ गोल गरेका थिए । रोनाल्डोले २००४ को संस्करणमा २, २००८ मा २, २०१२ र २०१६ मा समान ३–३ गोल गरेका थिए ।

रोनाल्डोको सबै ९ गोल डिबक्सभित्रबाट भएको छ । पाँच गोल हेडरमार्फत सम्भव हुँदा यो पनि उनको नाममा रहेको कीर्तिमान हो । फ्रान्सका एन्टोइन ग्रिजम्यानले राम्रो खेल्न सके रोनाल्डो र प्लाटिनी दुवैको रेकर्ड तोड्न सक्छन् । उनले प्रतियोगितामा अहिलेसम्म ६ गोल गरेका छन् । यी सबै गोल युरो २०१६ मा गरेका हुन् ।

युरो कपको छनोटमा सर्वाधिक गोल गर्ने रेकर्ड पनि रोनाल्डोकै नाममा छ । उनले यो संस्करणको छनोटसम्म आइपुग्दा ३१ गोल गरेका छन् । उनले रोब्बी केनको २३ गोलको कीर्तिमानलाई सेप्टेम्बर २०१९ मा तोडेका थिए ।

अभुतपुर्व सफलता

रोनाल्डोले आफ्नो कप्तानीमा टोलीलाई २०१६ मा युरोपेली च्याम्पियन बनाए । घरेलु टोली फ्रान्सविरुद्धको फाइनल खेलको २५औं मिनेटमा उनी घाइते भएर उनी बाहिरिएका थिए । तर उनले डगआउटमा बसेर (उनलाई छुट दिइएको थियो) टोलीलाई निरन्तर निर्देशन दिइरहे । पोर्चुगलले यो खेल अतिरिक्त समयमा १–० ले जित्यो ।

दुई युरोपेली च्याम्पियनसिपको फाइनल खेल्ने ४४ खेलाडीमध्ये रोनाल्डो एक हुन् । रोनाल्डोले २००४ र २०१६ को फाइनल खेले । कुनै पनि खेलाडीले युरोकपको तीनवटा फाइनल खेलेका छैनन् । केवल रोनाल्डो र बास्टियन स्ववाइन्सटाइगरले मात्र तीनपटक सेमिफाइनल खेलेका छन् ।

यदि यसपटक पनि रोनाल्डोले उपाधि जितेमा उनी पश्चिम जर्मनीका रेइनर बोनहोफ (१९७२ र १९८०) र युरो २००८ तथा २०१२ जित्ने स्पेनिस टोलीका १२ सदस्यहरुको ‘दुई युरोकप जित्ने’ सुचीमा उभिनेछन् ।

रोनाल्डोले युरोकपमा सर्वाधिक धेरै खेल (११ खेल) जित्ने स्पेनका सेस फाब्रिगास र आन्द्रेस इनिस्टाको कीर्तिमानलाई बराबरी गरेका छन् । यसपटक कुनै खेल जितेमा सर्वाधिक जित हासिल गर्ने कीर्तिमान रोनाल्डोको एकलौटी हुनेछ ।

लामो रेसको घोडा

आफ्नो क्षमताले भ्याएसम्म राष्ट्रिय टोलीबाट खेल्ने सबैको चाहना हुन्छ । चार युरो कप खेल्ने थोरै खेलाडीमध्ये रोनाल्डो एक हुन् । अब उन पाँच युरोकप खेल्ने एक्लो खेलाडी र सबैभन्दा धेरै खेल खेल्ने खेलाडी बन्नेछन् । उनले अहिलेसम्म युरोकपमा कुल २१ खेल खेलेका छन् । जुन जर्मनीका बास्टिन स्वान्स्टाइगरभन्दा तीन र इटलीका जियानलुजी बुफोनको भन्दा चार खेल बढीको हो ।

यस्तै रोनाल्डोसँग सर्वाधिक धेरै मिनेट युरोकप खेल्ने कीर्तिमान पनि छ । उनले १ हजार ७ सय ९५ मिनेट युरोकप खेलेका छन् । रोनाल्डोले युरोकपमा सर्वाधिक १ सय २२ पटक गोलका लागि प्रयास गरेका छन् । यो सूचीमा फ्रान्सका हेनरी थिएरी दोस्रोमा छन् । उनले गोलका लागि ५२ पटक गोलका लागि प्रयास गरेका थिए ।

गोलका लागि अवसर सिर्जना गराउनेको सुचीमा रोनाल्डो अन्या पाँच खेलाडीसँगै संयुक्त रुपमा दोस्रोमा छन् । उनले ५ वटा असिस्ट गरेका छन् । डेभिड बेकह्यामसहितका अन्य ५ खेलाडीले पनि ५ वटाअएसिस्ट मिलाइदिएका छन् । यो सुचीको शीर्षमा रहेका रहेका चेक गणतन्त्रका केरल पोबोस्र्काइले ६ वटा असिस्ट दिएका छन् । रोनाल्डोले यसपटक बराबरी गर्न वा तोड्न सक्नेछन् ।

रोनाल्डाले ८३ पटक ड्रिबलका लागि प्रयास गरेपनि ३१ पटकमात्रै उनले ड्रिबल पूरा गर्न सकेका छन् । सर्वाधिक धेरै ड्रिबल गर्ने कीर्तिमान पोर्चुगलकै लुइस फिगोको नाममा छ ।

बन्न सक्ने अन्य कीर्तिमान

रोनाल्डोले युरोकपको सर्वकालिन सर्वाधिक गोलकर्ता तथा पाँचपटक प्रतियोगिता खेल्ने कीर्तिमान यस युरोबाट राख्न सक्नेछन् । उनी तीनपटक फाइनल खेल्ने पहिलो खेलाडी पनि बन्न सक्छन् । रोनाल्डोको चारपटक सेमिफाइनल खेल्ने पहिलो खेलाडीको कीर्तिमान पनि राख्न सक्छन् ।

राम्रो खेल्दै गोल गर्न सकेमा रोनाल्डोले युरोमार्फत नै अन्तर्राष्ट्रिय गोलको कीर्तिमान आफ्नो नाममा लेखाउन सक्नेछन् । उनले पोर्चुगलका लागि अहिलेसम्म १ सय ४ गोल गरेका छन् । अन्तर्राष्ट्रिय फुटबलमा सर्वाधिक धेरै गोल गर्ने कीर्तिमान ईरानका अली दाईको नाममा छ । उनले १ सय ९ गोल गरेका छन् ।

रोनाल्डोको यादगार खेल

पोर्चुगल २– १ नेदरल्यान्डस् – युरो २००४ को सेमिफाइनलमा रोनाल्डोले पोर्चुगललाई अग्रता दिलाउँदा अर्काे गोलको लागि असिस्ट दिदै टोलीलाई घरेलु भुमिमा फाइनलमा पुर्याएका थिए ।

पोर्चुगल ३–३ हंगेरी – पोर्चुगल युरो २०१६ को समूह चरणबाटै बाहिरिने संघारमा रहँदा खेलमा पछि परेको अवस्थामा टोलीले उत्कृष्ट पूनरागमन गर्दा रोनाल्डोले दुई गोल गर्दै अघिल्लो चरणको बाटो देखाए । अन्ततः टोली च्याम्पियन नै बन्न सफल भयो । सोही संस्करणको सेमिफाइनलमा रोनाल्डोले वेल्सविरुद्ध एक गोल गर्दा अर्काे गोलको लागि असिस्ट दिए ।

सोही संस्करणको फाइनलमा रोनाल्डो २५औं मिनेटमै घाइते भएर मैदान छाड्न बाध्य बने । तर, उनले डगआउटमा बसेर टोलीलाई निर्देशन दिइरहे । अतिरिक्त समयमा घरेलु टोलीलाई १–० ले हराउँदै पोर्चुगल पहिलोपटक युरोपको च्याम्पियन बन्यो ।

बिर्सनलायक क्षण

सन् २००४ मा पोर्चुगललाई घरेलु भूमिमै उपाधि जित्ने अवसर रहँदा तुलनात्मक रुपमा कमजोर मानिएको ग्रीससँग १–० ले पराजित हुदा रोनाल्डोको गोल गर्ने सुवर्ण अवसर खेर फालेका थिए । यस्तै युरो २०१२ को सेमिफाइनलमा स्पेनसँग निर्धारित र अतिरिक्त समयको खेल गोलरहित बराबरी भएपछि पेनाल्टी सुटआउट बाट निर्णय लिदा रोनाल्डो पाँचौ नम्बरमा पेनाल्टी प्रहार गर्नका लागि रोनाल्डो प्रतीक्षामा थिए । तर, त्यो मौका आउनुअघि नै पोर्चुगल २–४ ले पराजित भयो ।

बीबीसी स्पोर्ट्सको सहयोगमा