काठमाडौँ (हाम्री खेलकुद) – आगामी कार्तिक १७ गतेबाट मलेसियाको कुचिङमा सुरु हुन लागेको एएफसी सोलिडारीटि कपमा सहभागि हुन लागेको नेपाली टोलीलाई चोटको समस्या परेको छ।
३० खेलाडी सम्मिलित प्रारम्भिक छनोटबाटनै प्रकाश बुढिथोकि र विकास तामाङ चोटका कारण बाहिरिएका थिए। यसबाहेक मिडफिल्डर विशाल राई र भरत खवासले पनि भर्खरै मात्र चोटबाट पुनरागमन गरेका हुन्।
खवास राष्ट्रिय टोलीमा सबैभन्दा धेरै घाइते हुने खेलाडी मानिन्छन्। उनको आक्रमक खेलशैलीले गर्दा उनले चोट बोक्ने सम्भावना बढि भएको देखिन्छ। करिब पाँच हप्ता अघिमात्र खवास बल लिने प्रयासमा कमल श्रेष्ठसंग जुध्दा हात भाँच्न पुगेका थिए। खवास अपरेसन गरेको तिन साता नबित्दै मैदानमा उत्रेका थिए। उनिबाट शत प्रतिशत खेलको आशा गर्न गाह्रो हुनेछ।
यस्तै मिडफिल्डमा राम्रो छाप बसाएका विशाल राई पनि डेढ महिनापछि गतसाता मैदान फर्किएका हुन्। घुँडाको चोटले गर्दा उनले दशैं अघि प्रशिक्षण गर्न सकेका थिएनन्।
रोहित चन्दलाई एसिएलका कारण गुमाएको ६ महिना बितिसक्दा पनि चन्दको मैदान फर्कने सम्भावना हाललाई कम छ। उनि अझै तिन महिना फुटबलबाट बाहिरै रहने बुझिएको छ।
