एजेन्सी – युरोपेली च्याम्पियनसिप २०२० को दोस्रो दिन आज (शनिबार) समूह चरणको विभिन्न तीन खेलमा प्रतिस्पर्धा हुँदैछ । समूह ‘ए’ मा रहेको वेल्सले स्वीट्जरल्यान्डको सामना गर्दा समूह ‘बी’ को दुवै खेल आज राति हुनेछ ।

वेल्स र स्वीट्जरल्यान्डबीचको खेल नेपाली समयअनुसार अजरवैजानको बाकुमा साँझ ६:४५ बजे हुनेछ । दुवै टोली जित निकाल्दै सुखद सुरुवात गर्ने लक्ष्यमा हुनेछ । सन् २०१६ को युरोकपको सेमिफाइनलमा स्थान बनाउन सफल भएको वेल्स लयमा रहेको स्वीट्जरल्यान्डलाई हराउँदै सुखद सुरुवात गर्ने लक्ष्यमा हुनेछ ।

टोलीसँग कप्तान ग्यारेथ बेलसँगै आरोन राम्से, ह्यारी विल्सन र ड्यानियज जेम्सको साथ रहेको छ । पछिल्लो दुई खेलमा जित निकाल्न नसकेको वेल्स स्वीट्जरल्यान्डलाई हराउँदै जितको लयमा फर्कन चहान्छ । वेल्सले युरोकप अघिको अभ्यास खेलमा फ्रान्ससँग ३–० ले पराजित हुँदा अल्वानियासँग गोलरहित बराबरी खेलेको थियो ।

यता, पछिल्लो सात खेलमा अपराजित रहेको स्वीट्जरल्यान्ड वेल्सलाई हराउँदै सुखद सुरुवात लिने लक्ष्यमा हुनेछ । स्वीट्जरल्यान्ड गत नोभेम्वरमा बेल्जियमसँग मैत्रीपुर्ण खेलमा २–१ ले पराजित भएयता अपराजित छ । त्यसपछि नेसन्स लिगमा स्पेनसँग १–१ गोलको बराबरी खेलेपछि स्वीट्जरल्यान्डले लगातार सात खेलमा जित निकालेको छ ।

सोही कारण पनि टोली उच्च मनोवलका साथ मैदान उत्रनेछ । यान सोम्मेर, म्यानुयल एकान्जी, जद्रान शाकिरी, ग्रानिट झाँका, ह्यारिस सेफेरोभिच र मारियो गाभरानोभिचजस्ता खेलाडीको साथ रहेको छ । यि दुई टोलीको पछिल्लो दुई भेटमा दुवै टोलीले समान एक खेल जितेका छन् ।

सन् २०१२ को लागि भएको युरो छनोटको पहिलो खेलमा स्वीट्जरल्यान्ड ४–१ ले विजयी हुदा त्यसपछि वेल्सले २–० को जित निकालेको थियो । यि दुई टोली एक दशकपछि एक आपसमा भिड्न लागेको हो । यही समूह ‘ए’ को पहिलो खेलमा उपाधि दावेदार इटालीले टर्कीलाई ३–० ले हराउँदै विजयी सुरुवात गरिसकेको छ ।

वेल्सको सम्भावित सुरुवाती ११ :ड्यानी वार्ड, क्रिस मेपहाम, जोई रोडन, बिन डाभिस, कोन्नर रोबर्ट्स, जोई एल्लेन, आरोन राम्से, निको विलियम्स, ड्यानियल जेम्स, ह्यारी विल्सन र ग्यारेथ बेल

स्वीट्जरल्यान्डको सम्भावित सुरुवाती ११ :यान सोम्मेर, निको इल्भेडी, फावियन स्चर, म्यानुयल एकान्जी, केभिन एमबाबु, रेमो फ्रेउलेर, ग्रानिट झाँका, रिकार्डाे रोड्रिग्वेज, जद्रान शाकिरी, मारियो गाभरानोभिच र ह्यारिस सेफेरोभिच