एजेन्सी – भेट्रान इटालियन गोलरक्षक जियानलुइगी बुफोन दुई दशकपछि आफ्नो पुरानो क्लब पार्मामा फर्किएका छन् । पार्मा दोस्रो डिभिजनमा घटुवा भएपनि बुफोनले आफ्नो पुर्व क्लब जाने निर्णय गरेका हुन् ।

पार्मा गत सिजन इटालियन सिरी ‘ए’ बाट दोश्रो डिभिजनमा घटुवा भएको थियो । पार्माले ४३ वर्षीय लेजेण्ड गोलरक्षक बुफोन क्लबमा फर्किएको पुष्टि गरेको छ । पार्माको ट्वीटर ह्यान्डलबाट सार्वजनिक भएको भिडियोमा बुफोनले आफु पुर्व क्लबमा फर्किएको र सुपरम्यान रिटन्र्स ब्याक ।’ देखाएको छ ।

बुफोनले सिरी ‘ए’ मा कीर्तिमानी ६५७ खेल खेलेका छन् । उनले सन् १९९५ मा १७ वर्षको उमेरमा पार्माबाट खेल्दै सिनियर व्यवसायिक खेल करियर शुरु गरेका थिए । युभेन्ट्सले बुफोनलाई २००१ मा त्यतिबेलाको गोलरक्षकको लागि कीर्तिमानी २५ मिलियन पाउन्ड खर्चेका थिए ।

बुफोनको बिदाईसँगै युभेन्टसमा उनको दोस्रो सिजनको पनि अन्तय हुनेछ । बुफोन २००१ मा पार्माबाट युभेन्टस पुगेका थिए । उनी २०१८ मा फ्रान्सेली क्लब पेरिस सेन्ट जर्मेन (पीएसजी) पुगेका थिए । त्यहाँ एक सिजन फ्रेन्च लिग वान जितेपछि उनी पुनः २०१९ मा युभेन्टस फर्किएका थिए । उनले हालसम्म ६८५ खेल खेल्दा ३२२ क्लिन सिट र २५ ट्रफी जितेका छन् । सिरी ‘ए’ मा उनले यो सिजन १४ खेलमा मात्रै मौका पाएका थिए।

उनले पार्माबाट समान एक पटक कोपा इटासलिया, सुपर कोपा इटालिया र युइएफए कप जितेका छन् । यस्तै युभेन्टसबाट १० सिरी ‘ए’, १ सिरी ‘बी’, ४ कोपा इटालिया, ६ सुपर कोपा इटालिया र च्याम्पियन्स लिगमा ३ सिजन उपविजेता बन्न सफल भएका थिए । पीएसजीबाट लिग वान र सुपर कप जितेका छन् । २००६ मा विश्वकप जितेका उनले इटालीको राष्ट्रिय टोलीबाट १७६ क्याप जितेका छन् ।