काठमाडौं (हाम्रो खेलकुद)– तीन विभागिय टोली पछि अन्य ए डिभिजन टोलीले पनि फुटबल एकेडेमी सञ्चालनको प्रयास थालेका छन् । अखिल नेपाल फुटबल संघ (एन्फा), संकटा क्लब र नेक्सस स्कुलबीच फुटबल एकेडेमी सञ्चालनका लागि मंगलबार सम्झौता भएको छ ।

सातदोबाटोस्थित एन्फा मुख्यालयमा भएको सम्झौतामा एन्फाका उपाध्यक्ष समेत रहेका युवा विकास समितिका अध्यक्ष उपेन्द्रमान सिंह, संकटाका कार्यवहाक अध्यक्ष सुरेन्द्र सिख्राकार र नेक्ससका प्रिन्सिपल आरबी कटुवालले सम्झौता पत्रमा हस्ताक्षर गरेका थिए ।
यसरी सञ्चालन हुने एकेडेमीको नाम नेक्सस संकटा युथ एकेडेमी रहनेछ । जसका लागि पहिलो १४ खेलाडीको छनोट गरिनेछ ।

संकटा र नेक्ससले समान ७ खेलाडी एकेडेमीमा राख्नेछन् । संकटाको मैदानमा उनीहरुलाई प्रशिक्षण दिइने छ भने नेक्ससले छात्रबृति प्रदान गर्ने जनाएको छ । सम्झौता अनुसार दोस्रो वर्ष एकेडेमीमा रहने २१ खेलाडीमध्ये १४ जना संकटाले प्रदान गर्नेछ ।

सामुदायमा आधारित ए डिभिजन क्लब मध्ये एकेडेमीका लागि सुरुवात गर्ने संकटा पहिलो क्लब बनेको छ । यसअघि नेपाल पुलिस क्लब, त्रिभुवन आर्मी फुटबल क्लब र नेपाल एपिएफ क्लबले एकेडेमी सञ्चालनका लागि खेलाडी छनोट गरेको थियो । त्यसका लागि एन्फाले खेलाडी छनोट गरि विभागिय टोलीलाई उपलब्ध गराएको थियो ।

यसरी छनोट भएका खेलाडी समान १४ खेलाडीका दरले विभागलाई उपलब्ध गराएको थियो । यसरी छनोट भएका हरेक विभागमा आबद्ध हुने ७ खेलाडीले पूर्ण छात्रबृति प्राप्त गरेका थिए भने बाँकी ७ खेलाडी शुल्क तिर्नुपर्ने छ । सम्झौता कार्यक्रममा एन्फा अध्यक्ष कर्मा छिरिङ शेर्पा, मानार्थ उपाध्यक्ष शिक्षत पराजुली, महासचिव इन्द्रमान तुलाधर, सह महासचिव अरुणमान जोशीलगायतको उपस्थिति थियो ।