एजेन्सी – फ्रान्सेली सेन्टरब्याक राफयल भरानले स्पेनिस क्लब रियल म्याड्रिड छाड्ने भएका छन् । उनले १० सिजन लामो रियल बसाईलाई बिट मादै इंग्लिस क्लब म्यानचेस्टर युनाइटेड जाने तय भएको बुझिएको छ ।

म्यानचेस्टर युनाइटेड र रियल म्याड्रिडबीच भरानको विषयमा सम्झौता भएको अन्तर्राष्ट्रिय सञ्चार माध्यमहरुले जनाएका छन् । म्यानचेस्टर र रियलबीच ४१ मिलियन पाउन्ड बराबर सम्झौता भएको बुझिएको छ । भरानले पनि क्लब छाड्ने भएपछि झन्डै एक दशपछि रियलको रक्षापङ्ति सर्जियो रामोस र भरानविनाको नै हुने भएको छ ।

रामोस पनि यसै समरमा रियल छाड्दै फ्रान्सेली क्लब प पेरिस सेन्ट जर्मेन (पीएसजी) पुगिसकेका छन् । भरान यो सिजनमा युनाइटेडको दोस्रो ठुलो सम्झौता हुनेछन् । यसअघि युनाइटेडले इग्लिस विंगर जेडान सान्चोलाई जर्मन क्लब बोरुसिया डर्टमुन्डबाट ७३ मिलियन पाउन्डमा अनुबन्ध गरेको थियो ।

दुई क्लबको बीचमा विगत एक महिनादेखि छलफल भइरहेको थियो । पछिल्लो साताको वार्ताले उनीहरु सहमति नजिक पुग्दा सोमबार भरानको पारिश्रमिकमा सहमति भएको हो । सम्झौता अनुसार ३४ मिलियन पाउन्ड पारिश्रमिक र ७ मिलियन बोनसको रुपमा रहनेछ । यसको अथै उनको मुल्य ४१ मिलियन पाउन्ड रहनेछ । यो सम्झौता पछि रियलले भरानको पुर्व क्लब लेन्सलाई १ मिलियन पाउन्ड तिर्नेछ ।

सम्भवत उनको मंगलबार मेडिकल परिक्षण हुनेछ । त्यसपछि म्यानचेस्टरले भरानलाई आधिकारिक रुपमा सार्वजनिक गर्नेछ । भरानको आगमनसँगै म्यानचेस्टरको रक्षापङ्ति इंग्लिस डिफेन्डर ह्यारी मगाएरले साझेदारी गर्नेछ । रियलमा सम्झौता अवधि एक वर्ष बाँकी छँदै २८ वर्षीय भरानले नयाँ चुनौती लिनको लागि सम्झौता नविकरणलाई इच्छुक भएनन् ।

भरानले नै क्लब छाड्ने मनासय बनाएपछि रियलले अर्काे समरमा फ्रि एजेन्टमा छाड्नुभन्दा यसै समरमा बेच्ने निष्कर्षमा पुगेको हो । सन् २०११ मा फ्रान्सेली क्लब लेन्सबाट रियल आएका सेन्टरब्याक भरानले रियलमा १० सिजन बिताउँदा ३६० खेलमा १७ गोल गरेका छन् ।

फ्रान्स २०१८ को विश्व विजेता बन्दा टोलीका सदस्य रहेका उनले रियलबाट तीन स्पेनिस ला लिगा, चार च्याम्पियन लिग, चार फिफा क्लब विश्वकप, तीन युइएफए सुपरकप, तीन स्पेनिस सुपर कप र एक कोपा डेल रे जितेका छन् । २०१३ देखि फ्रान्सको राष्ट्रिय टोलीमा रहेका भरानले ७९ खेलमा ५ गोल गरेका छन् ।