काठमाडौं (हाम्रो खेलकुद) – नेपाली राष्ट्रिय फुटबल टोलीका कप्तान तथा गोलरक्षक किरण चेम्जोङले सामाजिक संजालमार्फत सबैलाई एकतृत भएर अघि बढ्न आग्रह गरेका छन् ।

आइतबार प्रशिक्षक अब्दुल्लाह अलमुताइरीले वरिष्ठ उपाध्यक्ष पंकज नेम्वाङको कारण देखाउँदै राजीनामा दिने बताएपछि फुटबल वृतमा अहिले माहोल बदलिएको छ । साफ च्याम्पियनसिपको आयोजना र तयारीमा व्यस्त रहनुपर्ने समयमा अहिले प्रशिक्षकको राजीनामा प्रकरणले स्थान लिएको छ । प्रशिक्षक अलमुताइरीले औपचारिक रुपमा राजीनामा नबुझाएपनि उनी प्रशिक्षणमा भने उपस्थित भएनन् ।

कप्तान किरणले सोमबार बेलुका फेसबुकमार्फत गल्ती नभएर समाधान खोज्न आग्रहसहितको संदेश राखेका छन् । उनले लेखेका छन्, ‘राष्ट्रिय टोली परिवार हो । र एकै परिवामा बसेपछि केहि समस्या आउने हामीले सुनेकै छौं । हामीलाई थाहा छैन को सहि छ र को गलत तर हामी राष्ट्रिय टोली कसैलाई पनि गुमाउन चाहदैनौं । यो समय आउने खेल र प्रतियोगिताको लागि एकतृत हुने हो । त्यसैले गल्ती खोज्ने हैन, समाधान खोजौं । एक गोल एक राष्ट्र ।’

राष्ट्रिय टोलीको कप्तानले आफ्नो टोलीको प्रतिनिधित्व गर्दै सामाजिक संजालमा यस किसिमले प्रस्तुत हुनुले पनि टोलीको तयारीमा असर परेको बुझ्न सकिन्छ । मानसिक रुपमा पनि खेलाडीहरु कस्तो अवस्थामा छन् भन्ने आँकलन गर्न कठिन छैन । विश्वकप छनोटपछि एक लयमा प्रशिक्षण गरिरहेको टोलीमा यो प्रकरणले पक्कै ठेस पुर्याएको छ ।

एन्फाले प्रशिक्षकलाई तनावमा रहेको कारण केहि दिन विश्राम लिन भनेको प्रवक्ता किरण राईले जानकारी दिएका थिए । यता आरोप लागेका वरिष्ठ उपाध्यक्ष पंकन नेम्वाङले भने यस विषयको छानविन हुनुपर्ने माग राखेका छन् ।

यो पनि पढ्नुहोस : फुटबल खेलभित्रै एन्फा राजनीतिको बाछिट्टा