सुबास हुमागाईं, काठमाडौं

राष्ट्रिय टोलीका प्रशिक्षक अब्दुल्लाह अलमुताइरीले सामाजिक संजालमार्फत आइतबार राजीनामा दिने घोषणा गरेसँगै नेपाली फुटबल वृत आश्चर्यमा पर्यो । अखिल नेपाल फुटबल संघ (एन्फा) को चुनावको दिन नजीकिंदै जाँदा राजीनामाको क्रम एन्फाको लागि नयाँ थिएन । तर पदाधिकारीको जिम्मेवारीबाट सुरु भएको यो सुचिमा प्रशिक्षककै नाम आउला भन्ने सायदै कसैले सोचेको थियो । एन्फा पदाधिकारीबीच लामो समयदेखि चल्दै आएको शीत युद्धले यो रुप लिएपछि सबै आश्चर्यमा पर्नु स्वभाविक हो ।

प्रशिक्षक अलमुताइरी पछिल्लो समय नेपालकै सामाजिक संजालमा चर्चित पात्र मध्यमा पर्छन् । नेपाली फुटबल समर्थकमाझ प्रिय बनेका उनी आफ्नो व्यक्तिगत समय समर्थकमाझ रहेर पनि व्यतित गर्दै आएका छन् । पछिल्लो पटक राष्ट्रिय टोलीले केहि आशालाग्दो प्रदर्शन गरेपछि उनको चर्चा झनै चुलियो । उनले टोलीको हारपछि आफ्ना खेलाडीको बचाउमा दिएको अभिव्यक्तिले चौतर्फी प्रशंसा पाएको थियो ।

राष्ट्रिय टोलीको प्रशिक्षण सुरु हुँदा एन्फाले अन्य मिडियालाई प्रवेश नदिँदा अलमुताइरी आफैं नै सिधै समर्थकमाझ जोडिंदै आएका छन् । उनी पटक पटक फेसबुक लाइभमार्फत अन्तरक्रिया गर्ने गर्दछन् । यसले पनि उनलाई समर्थकमाझ थप लोकप्रिय बनाएको छ । त्यसैले पनि होला उनले आफू पद छाड्न एन्फा जाने घोषणा गरेपछि केहि समर्थक एन्फा परिसर बाहिर नै पुगेका थिए ।

प्रशिक्षक अलमुताइरीले आइतबार अकस्मात राजीनामा दिने बताउँदै एन्फा पुगेपछि त्यसबारे एन्फा अध्यक्ष कर्माछिरिङ शेर्पासँग छलफल गरे । उनले आफू तनावमा रहेको जानकारी दिए । एन्फा अध्यक्षले केहि विश्राम लिन सुझाव दिएको प्रवक्ता किरण राईले पछि संचारमाध्यमलाई जानकारी दिए । राईका अनुसार प्रशिक्षक अलमुताइरीले आफ्नो केहि आँकलन अनुसार नै वरिष्ठ उपाध्यक्ष पंकज विक्रम नेम्वाङलाई आरोप लगाएका हुन् । राईका अनुसार प्रशिक्षकले आधिकारिक रुपमा राजीनामा भने दिएका छैनन् ।

एन्फामा राजीनामाको क्रम नयाँ भने होइन । प्राविधिक समितिका संयोजक कृष्ण थापाले केहि दिन अघि मात्र प्रशिक्षक अलमुताइरीको सम्झौतालाई विषय बनाउँदै पद छोडेका थिए । उनले आफू संयोजक भएको नाताले सल्लाह समेत नगरी प्रशिक्षकको सम्झौता नविकरण गर्ने निर्णय भएकोमा विमति जनाउँदै समितिको संयोजक पदबाट राजीनामा दिएका हुन् ।

त्यसअघि एन्फाको होस्टेल व्यवस्थापन समितिका सदस्यले पनि राजीनामा दिएका थिए । समितिले काम गर्ने उचित वातावरण नभएको भन्दै राजीनामा दिएको थियो । केन्द्रिय सदस्य दिनेश व्यञ्जनकारको संयोजकत्वमा रहेको ३ सदस्यीय समितिका सहायक महासचिव अरुणमान जोशी र सहायक कोषाध्यक्ष राजेन्द्र न्यौपानेले पद छाडेका थिए ।

पछिल्लो समय एन्फा अध्यक्ष शेर्पा र वरिष्ठ उपाध्यक्ष नेम्वाङबीच राम्रो सम्बन्ध छैन । चुनाव नजिकिंदै जाँदा दुवै पक्षका पदाधिकारी र निकट व्यक्तिबीच टकराव आउन थालेको छ । शेर्पा अध्यक्ष हुँदा एकै प्यानलमा रहेर चुनाव जितेका नेम्वाङले पटक पटक शेर्पाको कार्यशैलीमा प्रश्न उठाउँदै आएका छन् । कार्यसमिति बैठक नै नराखेको भन्दै नेम्वाङले दुई पटक बैठकको माग गर्दै पत्र नै लेखेका छन् ।

अलमुताइरीले वरिष्ठ उपाध्यक्ष नेम्वाङकै कारण राजीनामा दिने बताइरहँदा नेम्वाङले आफू भने आश्चर्यमा परेको अभिव्यक्ति दिए । उनले यसबारे छानविन हुनुपर्ने र आफू दोषी भए पद छाड्ने बताएका छन् । नेम्वाङले प्रशिक्षकले आरोप लगाएजस्तो तीन सातायता आफ्नो प्रत्यक्ष सम्पर्क नै नरहेको दावी गरे । उनले प्रशिक्षकले केहि मिडियामा दिएको अन्तर्वार्तालाई लिएर भने एन्फा महासचिव इन्द्रमान तुलाधरलाई प्रशिक्षकसँग स्पष्टीकरण माग गरेको स्वीकारे ।

‘प्रशिक्षकले एउटा अन्तरवार्तामा फुटबल विकासका लागि पदाधिकारीले पनि परिवर्तन हुनुपर्छ भन्नुभएको छ । त्यो उहाँको दायरा भन्दा बाहिरको विषय हो भनेर मै महासचिवलाई कुरा गर्न भनेको थिए,’ उनले भने, ‘महासचिवले मौखिक रुपमा जानकारी गराइसकेको र आइन्दा त्यस्तो हुँदैन भनेको पनि मलाई भन्नुभएको थियो । मैले सहायक प्रशिक्षक किरण श्रेष्ठमार्फत पनि त्यहि असहमति राखेको थिए ।’

एन्फामा राजीनामा दिने क्रम चलिरहँदा प्रशिक्षकको राजीनामालाई चुनावसँग जोड्न नमिल्ने प्रवक्ता राईले बताए । उनले यसअघि सबै राजीनामा पदबाट नभएर विभिन्न समितिको जिम्मेवारीबाट मात्र भएको जनाउँदै एन्फाको शक्ति संघर्षसँग यसलाई जोड्न नमिल्ने अभिव्यक्ति दिए ।

प्रवक्ता राईले यसो भनिरहँदा एन्फाको चुनावी खेलमा भने अहिले नै भद्दा राजनीतिले स्थान लिइसकेको आँकलन गर्न सकिन्छ । राष्ट्रिय टोलीका प्रशिक्षकले नै वरिष्ठ उपाध्यक्षलाई आरोप लगाउनु सामान्य विषय होइन । प्रशिक्षकले एन्फालाई औपचारिक रुपमा जानकारी नदिई सामाजिक संजालमा लेख्दा एन्फाभित्र कार्यशैली कुन अवस्थामा छ भन्ने अनुमान गर्न सक्ने अवस्था छैन ।

एन्फाले अलमुताइरीलाई प्रशिक्षकको रुपमा कतार फुटबल संघबाट सहयोग पाएको हो । प्रो लाइसेन्स स्तरको प्रशिक्षकलाई कतारबाट पाउनु सहज पक्कै होइन । एकातर्फ फुटबल टोलीले मैदानभित्र केहि आशालाग्दो प्रदर्शन गर्नु, र अर्कोतर्फ प्रशिक्षकलाई निशानामा राख्नुले संस्थापन पक्षलाई लक्षित गरिएको हो कि भन्ने तर्क छ । तर वरिष्ठ उपाध्यक्ष नेम्वाङले आफूले कुनै गल्ति नगरेको बताउँदै छानविनको माग गरिरहेका छन् ।

एन्फा चुनाव आउँदै गर्दा यस्ता घटनाक्रम अझै नआउला भन्न सकिन्न । यसअघि पनि चुनावअघि एन्फामा भएका शक्ति संघर्षका उदाहरण हेर्ने हो भने लामै सुची बन्ला । तर यस्तो अवस्था सायदै थियो जहाँ राष्ट्रिय टोलीका प्रशिक्षक नै पदाधिकारीलाई आरोप लगाउँदै सार्वजनिक रुपमा अघि आएका छन् । पदाधिकारीको दाउपेचले खेलभित्र नै असर गर्नु दु:खद पक्ष हो । आरोप प्रत्यारोपमा वरिष्ठ उपाध्यक्ष नेम्वाङ वा प्रशिक्षक अलमुताइरीमध्य एक पक्षले जित्ला, तर यसले नेपाली फुटबलले भने हार बेहोर्ने देखिन्छ ।