एजेन्सी – युरोपियन च्याम्पियन इंग्लिस क्लब चेल्सीले प्रि–सिजन अन्तर्गतको पहिलो मैत्रीपूर्ण खेलमा जित निकालेको छ । मंगलबार राति भएको खेलमा चेल्सीले एक गोलले पछि परेको अवस्थामा घरेलु टोली बर्नमाउथमाथि २–१ को जित दर्ता गरेको हो ।

चेल्सीको जितमा अर्मान्डो ब्रोजा र इके उग्बोले गोल गरे । बर्नमाउथका इमिलियानो मार्कोन्डेसले एक गोल फर्काए । पहिलो हाफ गोलरहित बराबरीमा सकिदा दोस्रो हाफमा घरेलु टोली बर्नमाउथले ६६औं मिनेटमा मार्कोन्डेसको गोलबाट सुरुवाती अग्रथा लिएको थियो ।

तर बर्नमाउथको त्यो अग्रता लामो समय टिकेन । ७२औं मिनेटमा अर्मान्डो ब्रोजाले गोल गर्दै चेल्सीलाई खेलमा फर्काए । ७६औं मिनेटमा उग्बोले गोल गर्दै चेल्सीलाई २–१ को पूनरागमन जित पदलाए । चेल्सीले अब आर्सनल र टोटेनहमसँग पनि मैत्रीपुर्ण खेल खेल्ने तालिका छ । त्यसपछि चेल्सीले १२ अगस्टमा युइएफए सुपर कपको उपाधि लागि स्पेनिस क्लब भिल्लारियलसँग खेल्दै छ ।

यस्तै गत सिजनको प्रिमियर लिग च्याम्पियन म्यानचेस्टर सिटीले मैत्रीपुर्ण खेलमा दोस्रो डिभिजन क्लब प्रेस्टनमाथि २–० को सहज जित दर्ता गरेको छ । सिटीको जितमा रियाद महारेज र सामुअल इडोजेले गोल गरे । खेलको २५औं मिनेटमा महारेजले गोल गर्दै सिटीलाई अग्रता दिलाए । ६४औं मिनेटमा इडोजेले गोल गर्दै सिटीलाई २–० को सहज जित दिलाए ।

सिटीले ७ अगस्टमा कम्युनिटी शिल्डको उपाधिको लागि प्रिमियर लिग प्रतिद्धन्द्धी लेस्टर सिटीसँग खेल्दैछ । त्यसअघि सिटीले १ अगस्टमा फ्रान्सेली क्लब ट्रोएससँग मैत्रीपुर्ण खेल खेल्दैछ ।