एजेन्सी – लेस्टर सिटीमाथि सानदार जित निकाल्दै वेस्ट ह्याम युनाइटेड इंग्लिस प्रिमियर लिगको शीर्ष स्थानमा उक्लिएको छ । वेस्ट ह्यामले समान ६ अंक भएपनि चेल्सी, लिभरपुल, ब्राइटन र टोटेनहमलाई गोल अन्तरमा पछि पार्दै शीर्षस्थान कब्जा गरेको हो ।

घरेलु मैदानमा वेस्ट ह्यामले १० खेलाडीमा समेटिएको लेस्टर सिटीमाथि ४–१ को फराकिलो जित निकालेको हो । वेस्ट ह्यामको फराकिलो जितमा मिचेल एन्टेनियोले दुई तथा पाब्लो फोर्नाल्स र सेड बेनरहमाले समान एक गोल गरे । लेस्टरका युरी टिलेमान्सले एक गोल फर्काए ।

लन्डन स्टेडियम लन्डनमा सोमबार राति भएको खेलको २६औं मिनेटमा पाब्लो फोर्नाल्सको गोलबाट घरेलु टोलीले अग्रता लिएको थियो । उनले सेड बेनरहमाको पासमा गोल गरेका थिए । ४०औं मिनेटमा एयोजी पेरेज सिधै रातो कार्ड खाँदै मैदानबाट बाहिरिएपछि लेस्टर समस्यामा परेको थियो । जसको फाइदा वेस्ट ह्यामले उठाउन सफल भयो ।

५६औं मिनेटमा मिचेल एन्टेनियोले दुई गोल तथा एक असिस्ट दिएपछि वेस्ट ह्यामले फराकिला जित निकाल्न सफल भयो । ५६औं मिनेटमा सेड बेनरहमाले गोल गर्दै वेस्ट ह्यामलाई २–० ले अघि बढाए । उनले मिचेल एन्टेनियोको पासमा गोल गरेका थिए । ६९औं मिनेटमा युरी टिलेमान्सले गोल गर्दै खेललाई २–१ को अवस्थामा ल्याउदै लेस्टरलाई खेलमा फर्कने संकेत दिए ।

तर त्यसपछि मिचेल एन्टेनियोले दुई गोल गर्दै वेस्ट ह्यामलाई फराकिलो जित दिलाए । ८०औं मिनेटमा मिचेल एन्टेनियोले डिक्लन राइसको पासमा गोल गर्दै खेललाई ३–१ को अवस्थामा ल्याए । ८४औं मिनेटमा मिचेल एन्टेनियोले भ्लादिमर कोउफलको पासमा व्यक्तिगत दोस्रो तथा टोलीका लागि चौथो गोल गर्दै वेस्ट ह्यामलाई सानदार जित दिलाए ।

यो जितसँगै वेस्ट ह्याम २ खेलबाट ६ अंक जोडेर शीर्षस्थानमा उक्लिएको छ । चेल्सी, लिभरपुल, ब्राइटन र टोटेनहमको पनि ६ अंक रहेपनि गोल अन्तरमा शीर्ष पाँचमा रहेका छन् । पराजित लेस्ट ३ अंक जोडेर १२औं स्थानमा छ । लेस्टरले पहिलो खेलमा वल्भ्सलाई १–० ले हराएको थियो ।