कुचिङ (हाम्रो खेलकुद)–  नेपालले आज साँझ ब्रुनाईसँग एएफसी सोलिडारिटी कपको समूह चरणको अन्तिम खेलमा पहिलो खेलको टोलीमा ठूलो परिवर्तन गर्ने सम्भावना छैन । लिमोर लेस्टेसँगको खेलमा पहिलो रोजाइमा परेका मध्ये एकजना मात्र परिवर्तन हुनसक्छन् । लिमोर लेस्टेसँग गोलरहित बराबरी भएको खेलमा दोस्रो हाफमा मैदान प्रवेश गरेका आर्मीका भरत खवासले आज पहिलो रोजाइमा पर्न सक्छन् । पहिलो खेलमा प्रभाव छोडेका कारण भारतले मौका पाउने सम्भावना बढेको हो । उनी सुरुआतमा परे अन्जन विष्टलाई बेन्चमा रहनेछन्, खेलको आवश्यकता अनुसार उनी दोस्रो हाफमा ओर्लन सक्छन् ।

नेपाल ४–४–२ को रणनीतिमा ओर्लने सम्भावना रहेकोले फरवार्ड लाइनमा भरतको जोडीका रुपमा नवयुग श्रेष्ठले निरन्तरता पाउनेछन् । पहिलो खेलमा प्रभाव छोड्न असफल रहेपनि पछिल्लो बर्षमा नवयुगले गरेको प्रदर्शनलाई नजरअन्दाज गर्ने पक्षमा सम्भवत नेपाली टोलीका जापानी प्रशिक्षक ग्याटुको कोजी हुने छैनन् । भरत फरवार्ड लाइनमा खेल्ने हुँदा विमल घर्तीमगर लेफ्ट विङ्समा खेल्ने छन् भने राइट विङ्सको जिम्मा सुजल श्रेष्ठको हुनेछ । विमलले पहिलो खेलमा विङ्सबाट पनि राम्रो खेलेका थिए । मिडफिल्डमा विक्रम लामा र फेरी एकपटक हेमन गुरुङले मौका पाउनेछन् । विशाल राई पूर्ण रुपमा फिट नभएकाले कोजी रिस्क लिने पक्षमा छैनन् । आवश्यकता अनुसार विशाललाई पनि कोजीले प्रयोग गर्न सक्नेछन् । रक्षापक्ति र गोलकिपरमा पनि पहिलो खेलकै यथावत रहनेछन् । किरण चेम्जोङले गोलपोस्ट सम्हाल्नेछन् भने कप्तान विराज महर्जनसहित रक्षापक्तिमा रविन श्रेष्ठ, अनन्त तामाङ र आदित्य चौधरी हुनेछन् ।
कोजीले मैदानको अवस्थाले प्रदर्शनमा प्रभाव पार्न सक्ने भन्दै रक्षात्मक प्रतिक्रिया दिएका छन् । ‘मुख्य त मैदानको अवस्थाले प्रदर्शनमा असर गर्न सक्छ । पहिलो खेलमा मैदान भिजेकोले हाम्रले अपेक्षा अनुसारको प्रदर्शन गर्न सकेका थिएनौं ’ सोमबार उनले भनेको थिए ‘तर पनि हामीले जस्तो सुकै परिस्थितिमा पनि खेल्नु पर्ने छ र सफल नतिजाका लागि प्रयास गर्नुपर्नेछ ।’ कोजीले मुख्यत स्कोरिङ र मिडफिल्डमा ध्यान दिनुपर्नेमा जोड दिएका छन् । उनले पहिलो खेलमा नेपाली खेलाडी त्यसमै चुकेको स्वीकारेका थिए ।
उता पहिलो खेल जितेको ब्रुनाई सेमिफाइनल पुगिसकेकोले नेपाल भन्दा कम दबाबमा हुनेछ । पहिलो चरण पार गरिसकेकोले टोलीका कोरियाली प्रशिक्षक क्वान पहिलो रोजाइका खेलाडीलाई आराम दिने पक्षमा छन् । धेरै खेलाडीलाई गोलीगाँठाको समस्या रहेकाले उनीले खेलाडीलाई जोगाउन प्राथमिकता भएको बताएका छन् । यद्दपी, नेपाललाई कमजोर नआक्ने र सफल नतिजाका लागि प्रयत्न गर्ने बताएका छन् ।
नेपालले ब्रुनाईलाई हराउन सके समूह विजेताका रुपमा सेमिफाइनल पुग्ने छ । बराबरीमा रोकिएमा नेपाल समूहको उपविजेता बन्नेछ । ४ वा त्यो भन्दा कम गोलअन्तरले हरेको खण्डमा समेत नेपाल अघिल्लो चरण पुग्ने समिकरण छ । लिमोर लेस्टे पहिलो खेलमा ४–० को फराकिलो अन्तरले पराजित भएकाले त्यसको फाइदा नेपाललाई पुग्न सक्छ । ब्रुनाईसँग ५ गोलअन्तरले स्तब्ध भएमा नेपाल पहिलो चरणबाटै घर फर्कनु पर्नेछ ।

ब्रुनाईविरुद्ध सम्भावित नेपाली टोली
किरण चेम्जोङ (गोलकिपर), विराज महर्जन (कप्तान), रविन श्रेष्ठ, अनन्त तामाङ, आदित्य चौधरी, विमल घर्तीमगर, विक्रम लामा, हेमन गुरुङ, सुजल श्रेष्ठ, भरत खवास, नवयुग श्रेष्ठ