कुचिङ (हाम्रो खेलकुद) – पहिलो खेलको दाँजोमा फरवार्डहरु चलेपछि नेपालले एएफसी सोलिडारिटी कपअन्तर्गत समूह चरणको अन्तिम खेलमा ब्रुनाईलाई ३–० ले हराएको थियो । फरवार्ड नवयुग श्रेष्ठ, भरत खवास र विमल घर्तीमगरले गोल गरेपछि नेपालले दोस्रो खेलमा सहज जित हासिल गरेको थियो ।
यो नतिजासँगै नेपाल समूह एको विजेता बनेको छ । दुई खेलमा नेपालको ४ अंक पुगेको छ। । पहिलो जितबाटै सेमिफाइनल पुगिसकेको ब्रुनाई ३ अंकसहित समूहको उपविजेता बनेको छ । नेपालसँग बराबरी खेलेको र ब्रुनाईसँग ४–० ले हराएको टिमोर लेस्टे (१ अंक) प्रतियोगिताबाट बाहिरीएको छ ।
पहिलो हाफको इन्जुरी समयमा गोल गर्दै नवयुगले नेपाललाई अग्रता दिलाएका थिए । हेमन गुरुडका प्रहार लाई विपक्षी रक्षकले रोकेपछि रिबाउन्डमा प्राप्त बलमा दोस्रो प्रयामा नवयुग गोल गर्न सफल भएका हुन् । नवयुग पहिलो खेलमा भने अपेक्षा अनुसार चलेका थिएनन् । आज पहिलो रोजाइमा परेको भरत खवासले ७३ औं मिनेटमा गोल गर्दै अन्तरलाई दोब्बर पारे । विमलको कर्नरलाई नवयुगले हेडले अगाडी खसाल्देको बलमा भरतले पेनाल्टी बक्स भित्रबाट गोल गरेका थिए । त्यस्तै ८० औं मिनेटमा विमलले पेनाल्टीमा गोल गर्दै नेपालको जित निश्चित पारेका थिए । विमललाई विपक्षी खेलाडीले पेनाल्टी बक्समा जर्सी तानेर लडाएपछि नेपालले पेनाल्टी पाएको थियो । गत बर्ष बंगबन्धु गोल्डकप र दक्षिण एसियाली खेलकुदमा यू २३ मा स्वर्ण पदक जितेको नेपाल यसपटक सोलिडारिटी कप जित्ने लक्ष्यका साथ मलेसिया पुगेको थियो ।
