एजेन्सी – फिफा विश्वकप कतार २०२२ को दक्षिण अमेरिकी छनोटमा आज (आइतबार) राति ब्राजिल र अर्जेन्टिनाबीच प्रतिस्पर्धा हुदैछ । यि दुई टोली झन्डै दुई महिनाको अन्तरमा खेल्न लागेका हुन् ।

खेल एरिना कोरिन्थिएन्स साओ पाउलोमा नेपाल समयअनुसार राति १२ः४५ बजे हुनेछ । घरेलु मैदानमा हुने खेलमा ब्राजिल अर्जेन्टिनालाई हराउँदै गत जुलाईमा घरेलु मैदानमा कोपा अमेरिका कपको फाइनलमा भोगेको हारको बदला र छनोटमा अपराजित रहने लक्ष्यसहित मैदान उत्रनेछ ।

दक्षिण अमेरिकी छनोटमा लगातार सातौ जित निकालेको ब्राजिलको ७ खेलबाट २१ अंक छ । अर्जेन्टिना ७ खेलबाट १५ अंक जोडेर दोस्रो स्थानमा रहेको छ । दक्षिण अमेरिकी छनोटबाट शीर्ष चारमा रहने टोलीले विश्वकपमा स्थान पक्का गर्नेछ । पाँचौ टोलीले प्ले अफ खेल्नुपर्नेछ ।

तर ब्राजिललाई मुख्य खेलाडीको अभाव खड्कनेछ । इंग्लिस प्रिमियर लिग खेल्ने ब्राजिली खेलाडीलाई क्लबले फुकुवा गरेका छैनन् । पहिलो रोजाईका गोलरक्षक एलिसन बेकर, कप्तान थियागो सिल्भा, फ्रेड, रेनान लोडी, गाब्रियल जेसस, रिचार्लीसन र रोबर्टाे फिर्मिनो अर्जेन्टिनाविरुद्धको खेलमा हुने छैनन् ।

तर टोलीसँग नेयमारसँगै युवा प्रतिभावान खेलाडीको साथ रहेको छ । गाब्रियल बार्बाेसा, क्यासमिरो, भिनिसियस जुनियर, मार्किन्हस, इडर मिलिसाओ र डानिलो टोलीमा रहेका छन् । ब्राजिलको पोस्ट वेभर्टनले सम्हाल्ने पक्का छ । एलेक्स सान्द्रो, लुकास पाक्वेटा, ब्रुनो गुइमाराइस, एर्भटन रिवेइरो, जर्सन, म्याथिअस कुन्हा, ड्यानी आल्भेस, हल्क र मिरान्डा पनि टोलीमा रहेका छन् ।

यता, छनोटमा अपराजित रहेको अर्जेन्टिना पनि ब्राजिललाई छनोटमा पहिलो हार चखाउने लक्ष्यमा मैदान उत्रनेछ । कप्तान लियोनेल मेस्सीले ब्राजिलविरुद्ध खेल्न प्रवल सम्भावना छ । मेस्सीले भेनेजुएलाविरुद्ध ३–१ को जि निकालेको खेलमा गम्भीर ट्याकलको सामना गर्नुपरेको थियो ।

टोलीसँग लोउटारो मार्टिनेज, एन्जल डि मारिया, गुइडो रोड्रिग्वेज, रोड्रिगो डि पउल, जियोभानी लो सेल्सो, मार्काेस एकुन्ना, निकोलस ओटामेन्डी, जर्मन पिज्जेला, नाहुल मोलिना र गोलरक्षक इमिलियानो मार्टिनेज रहेका छन् । यसबाहेक एन्जल कोरेआ, जोआक्विन कोरेआ, पाउलो डिबाला र पालासिओस पनि टोलीमा रहेका छन् ।

यि दुई टोलीबीचको पछिल्लो १४ भिडन्तमा दुवै टोलीले समान ६ खेलमा जित निकालेका छन् । दुई खेल बराबरीमा सकिएको छ । पछिल्लोपटक यि दुई टोलीले गत जुलाईमा कोपा अमेरिका कपको फाइलमा प्रतिस्पर्धा गर्दा अर्जेन्टिनाले १–० को जित निकालेको थियो । त्यसअघि सन् २०१९ को मैत्रीपुर्ण खेलमा ब्राजिलले १–० को जित निकालेको थियो ।

दक्षिण अमेरिकी छनोट अन्य खेल
इक्वेडरविरुद्ध चिली (सोमबार बिहान २ः४५ बजे)
पाराग्वेविरुद्ध कोलम्विया (सोमबार बिहान ३ः४५ बजे)
उरुग्वेविरुद्ध बोलिभिया(सोमबार बिहान ३ः४५ बजे)
पेरुविरुद्ध भेनेजुएला (सोमबार बिहान ६ः४५ बजे)