काठमाडौं (हाम्रो खेलकुद) – एकै सातामा राष्ट्रिय फुटबल टोलीको पुरुष र महिला टोलीले दशरथ रंगशालामा मैत्रीपूर्ण खेल खेल्ने भएका छन् । पुरुषतर्फ नेपाल र भारतबीचको दोस्रो मैत्रीपूर्ण आइतबार भएको थियो । दोस्रो खेलमा नेपाल २–१ ले पराजित भएको थियो भने बिहीबार दुई टोलीले १–१ को बराबरी खेलेका थिए ।

यो र अर्को साता नेपाल र बंगलादेशका राष्ट्रिय महिला टोलीबीच दुई मैत्रीपूर्ण खेल हुनेछ । जसका लागि बंगलादेशको टोलीले सोमबार काठमाडौं आइपुगेको छ । टोलीलाई महिला समितिकी अध्यक्ष बृन्दा देवान, वमन्स कमिटीकी संयोजक पेमा लामा, एन्फाका मानार्थ उपाध्यक्ष शिक्षित पराजुलीलगायतले बंगलादेशी टोलीलाई त्रिभुवन अन्तर्राष्ट्रिय विमानस्थलमा स्वागत गरेका थिए । मैत्रीपुर्ण खेल पहिलो बिहीबार र दोस्रो आइतबार हुनेछ ।

महिला टोलीका मुख्य प्रशिक्षक ग्यारी फिलिप्सले एएफसी महिला एसिया कप छनोटका लागि २३ सदस्यीय टोलीको घोषणा गरेको छ । जसमा ७ नयाँ खेलाडीले सिनियर राष्ट्रिय टोलीमा स्थान बनाएका छन् । नेपालले एसिया कप छनोटको तयारीका सिलसिलामा मैत्रीपूर्ण खेल खेल्न लागेको हो ।

नेपालले हङकङ र फिलिपिन्ससँग अर्काे महिना खेल्दैछ । उज्वेकिस्तानमा हुने छनोटमा नेपालले असोज २ गते फिलिपिन्स तथा असोज ४ गते हङकङसँग प्रतिस्पर्धा गर्नेछ । समूहको शीर्ष टोली भारतमा अर्को वर्ष हुने एसिया कपका लागि छनोट हुनेछ । अखिल नेपाल फुटबल संघले मैत्रीपूर्ण खेलका लागि भिआइपीतर्फ ५ सय र साधारणतर्फ २ सय रुपैयाँ टिकट दर तोकेको छ ।