एजेन्सी – स्पेनिस ला लिगाको शीर्षस्थानमा रहेको रियल म्याड्रिड बराबरीमा रोकिएको छ । रियल म्याड्रिड घरेलु मैदानमा भिल्लारियलसँग गोलरहित बराबरीमा रोकिएको हो ।

सान्टियागो बर्नबेउमा शनिबार राति भएको प्रतिस्पर्धात्मक खेलको १३औं मिनेटमा डानजुमाको प्रहारलाई रियलको गोलरक्षक थिवाउट कोर्टुवाले बचाए । २३औं मिनेटमा रोड्रिगोको क्रसलाई भिल्लारियलका गोलरक्षक रुल्लीले कुनै खतरा हुने दिएन । ३१औं मिनेटमा पिनोको पासमा पाको एल्कासेरको प्रहारलाई गोलरक्षक कोर्टुवाले बचाउँदा भिल्लारियल अग्रता लिनबाट चुक्यो ।

५१औं मिनेटमा कप्तान बेन्जेमाको हेडर सदुपयोग हुन नसक्दा रियल अग्रता लिनबाट चुुक्यो । ८३औं मिनेटमा इस्कोको हेडरलाई विपक्षी डिफेन्डरले क्लियर गरिदिए । लगत्तै ८४औं मिनेटमा इडुआर्डाे कामाभिंगाको ओभर हेड किकलाई गोलरक्षक रुल्लीले नियन्त्रणमा लिदा रियल निराश बन्न पुग्यो ।

लयमा रहेका कप्तान करिम बेन्जेमा र भिनिसियस जुनियरले भिल्लारियलविरुद्धको खेलमा गोल गर्न सकेनन् । रियलले यो सिजन गरेको २२ मध्ये १३ गोल यि दुई फरवार्डको नाममा रहेको छ ।बेन्जेमाले ८ तथा भिनिसियसले ५ गोल गरेका छन् ।

यो सिजन रियलको यो दोस्रो बराबरी हो । यसअघि रियलले लेभान्टेसँग ३–३ गोलको बराबरी खेलेका थिए । रियलले ला लिगामा ५ जित र २ बराबरीको नतिजा निकालेको छ ।

यो बराबरीपछि पनि अपराजित रहेको रियल ७ खेलमा १७ अंक जोडेर शीर्षस्थानमा यथावत रहेको छ । रियलले दोस्रो स्थानमा रहेको एक खेल कम खेलेको सेभियालाई ३ अंकले पछि पारेको छ । एलाभेससँग १–० को हार बेहोरेको एट्लेटिको म्याड्रिडको पनि १४ अंक नै छ । भिल्लारियल ६ खेलबाट ८ अंक जोडेर १०औं स्थानमा रहेको छ ।

अन्य नतिजा

एलाभेसविरुद्ध एट्लेटिको म्याड्रिड (१–०)

भ्यालेन्सियाविरुद्ध एथलेटिको बिल्वाओ (१–१)

सेभियाविरुद्ध स्पान्योल (२–०)