काठमाडौं (हाम्रो खेलकुद)– माल्दिभ्समा दक्षिण एसियाली राष्ट्रको सबैभन्दा ठूलो फुटबल प्रतियोगिता साफ च्याम्पियनसिप शुक्रबार सुरु हुँदैछ । यसपटक प्रतियोगितामा ५ राष्ट्रको मात्र सहभागिता रहने भएकोले राउन्ड रोविन लिगका आधारमा च्याम्पियनसिप हुँदैछ ।

दक्षिण एसियाली फुटबल महासंघ (साफ) ले खेल तालिकामा केहि फेरबदल गरेको छ । यसअघि नेपाल र आयोजक माल्दिभ्सबीच उद्घाटन खेल हुने भनिए पनि अब श्रीलंका र बंगलादेशबीच हुने भएको छ । नेपाल र माल्दिभ्सले भने शुक्रबार नै नेपाली समय अनुसार राती ९ः४५ बजे प्रतिस्पर्धा गर्नेछन् । बंगलादेश र श्रीलंकाबीचको खेल नेपाली समय अनुसार दिउँसो ४ः४५ बजे सुरु हुनेछ ।

राउन्ड रोविनमा सबै टोलीले ४ खेल खेल्नुपर्नेछ । नेपाल र आयोजक माल्दिभ्सलले ४ मध्ये ३ खेल राती एक खेल दिउँसो खेल्नेछ । भारत, श्रीलंका र बंगलादेशले दिउँसो र राती समान २ खेल खेल्नेछन् । असोज १८ गते पहिलो खेल बंगलादेश र भारतबीच हुनेछ । दास्रो खेलमा नेपालले श्रीलंकाको सामना गर्नेछ ।

खेल हुने दिन एक टोलीले भने विश्राम पाउनेछ । असोज २१ गते नेपालले खेल्ने छैन । त्यस दिन भारत र श्रीलंका तथा माल्दिभ्स र बंगलादेशबीच प्रतिस्पर्धा हुनेछ । असोज २४ गते राती ९ः४५ बजे नेपाल र भारतबीच खेल हुनेछ । एक महिना भन्दा केहि लामो समयको अन्तरपछि यि दुई टोली फेरि भिड्दैछन् । साफ च्याम्पियनसिपकै दौरानमा नेपाल र भारतले दशरथ रंगशालामा दुई मैत्रीपूर्ण खेल खेलेका थिए । भदौ १७ गतेको खेल १–१ को बराबरीमा टुंगिएको थियो भने भदौ २० गतेको खेलमा भारत २–१ ले विजयी भएको थियो ।

त्यसपछि नेपाली टोलीले कतारमा साफका लागि अन्तिम तयारी गरेको थियो । राउन्ड रोविनको अन्तिम दिन असोज २७ गते दिउँसो नेपाल र बंगलादेश तथा राती भारत र माल्दिभ्सबीच प्रतिस्पर्धा हुनेछ । राउन्ड रोविनका शीर्ष २ टोलीले असोज ३० गते राती ८ः४५ बजे उपाधिका लागि खेल्नेछन् । नेपाली टोली अहिले सम्म साफ च्याम्पियनसिपको फाइनल पुग्न सकेको छैन ।