एजेन्सी – इटालियन पुर्व फरवार्ड एन्टोनियो कसानो धेरै बोलिरहन्छन् । उनको बोलीलाई कति सत्य मान्ने कति नमान्ने त्यो शंकाकै विषय हुनेछ । तर पछिल्लोपटक एन्टोनियो कसानोले पेरिस सेन्ट जर्मेन (पीएसजी) का प्रशिक्षक मौरिसियो पोचेटिनोबारे गरेको टिप्पणीले विश्व खेलकुदमा चर्चा बटुलिरहेको छ ।

उनका अनुसार अब पार्क डेस प्रिन्सेसको डग आउटमा मौरिसियो पोचेटिनोको स्थानमा जिनेदिन जिदान आउने छन् । गत साता पीएसजी लिग वानमा रेनेससँग २–० ले स्तब्ध बनेपछि क्लबमा पोचेटिनोको समर्थन र उनको कार्यशैलीमा विश्वास टुट्दै गएको छ ।

‘पोचेटिनोको पीएसजीमा समय निकै कम छ,’ कसानोले भने, ‘मानिसहरुले उनीबारे निकै नराम्रो कुराहरु सुनाएका छन् । मैले निकै नराम्रो हल्लाहरु सुनेको छु ।’

‘उनी निकै राम्रो मानिस हुन्, तर प्रशिक्षक.. उनी एक मिनेट पनि रणनीतिक छलफल गर्दैनन् र खेलाडीहरूले पनि यसको माग गरिरहेका हुन्छन् । बरु उनले खेलाडीहरुलाई कसरी खेल्ने भनेर सुझाव मागिरहेका हुन्छन्,’ उनले भने, ‘मैले जे सुने मलाई नै विश्वास लागिरहेको छैन । उनले अहिलेसम्म च्याम्पियनहरूलाई प्रशिक्षण गरेका छैनन् र उनलाई निकै कठिन भइरहेको छ । जहाँसम्म मैले सुनेको छु, यस्तै चल्ने हो भने उनी त्यहाँ धेरै टिक्दैनन् । जिजुमाथि आँखा राखिराख्नु ।’

स्पेनिस क्लब रियल म्याड्रिड छाडेयता जिदानको नाम युभेन्टस र फ्रान्ससँग जोडिदै आएको छ । तर पीएसजी पनि उनको सम्भावित गन्तव्यमा थपिएको छ । रियल पुगेपछि उनी ‘सुपरस्टार’ हरुको अंहकारलाई व्यवस्थापन गर्न सफल भएको र लगातार तीनवटा च्याम्पियन्स लिगको उपाधि जिताएका थिए ।

रियलमा ग्यारेथ बेल, करिम बेन्जेमा र क्रिस्टियानो रोनाल्डो थिए । पीएसजीमा अहिले केलियन एम्बाप्पे, नेयमार र लियोनेल मेस्सी छन् जसको व्यवस्थापन पोचेटिन्होले गर्न सकिरहेका छैनन् । यदि पीएसजीलाई सुपरस्टारहरुको व्यवस्थापन गर्ने कोही व्यक्ति चाहिएको हो भने त्यसका लागि जिदान सही व्यक्ति हुनसक्छन् । मार्काबाट