एजेन्सी – एक गोलले पछि परेको अवस्थामा सर्ज जिनाब्री र थोमस मुलरले गोल गरेपछि जर्मनीले फिफा विश्वकप कतार २०२२ को युरोपियन छनोटमा रोमानियालाई पराजित गरेको छ ।

घरेलु मैदानमा शुक्रबार राति भएको खेलमा जर्मनीले रोमानियालाई २–१ को पराजित गरेको हो । पाहुना टोलीका लानिस हाँगीको गोल सान्त्वना बन्यो । ह्यामवर्गमा भएको खेलको ११औं मिनेटमा लानिस हाँगीको गोलबाट जर्मनी खेलमा पछि परेको थियो । एक गोलले पछि परेको जर्मनीले रोमानियालाई दवाव बढाएपनि बराबरी गोलको लागि दोस्रो हाफ नै कुर्नुपरेको थियो ।

५२औं मिनेटमा मार्काे रिउसको पासमा सर्ज जिनाब्रीले गोल गर्दै खेललाई १–१ गोलको बराबरीमा ल्याए । ८१औं मिनेटमा वैकल्प्कि खेलाडी थोमस मुलरले गोल गर्दै जर्मनीको जित पक्का गरे । ६७औं मिनेटमा टिमो वेर्नरको स्थानमा मैद्यान छिरेका मुलरले लियोन गोरेट्जकाको पासमा गोल गरेका थिए ।

यही समूह ‘जे’ को अर्काे खेलमा नर्थ म्यासेडोनियाले लिचेस्टाइनलाई ४–० ले पराजित गर्दा आइसल्यान्ड र अर्मेनियाले १–१ गोलको बराबरी खेल्दै अंक बाँडेका छन् ।

यो नतिजापछि जर्मनी ७ खेलबाट १८ अंक जोडेर शीर्षस्थानमा रहेको छ । पराजित रोमानिया १० अंकसहित चौथो स्थानमा रहेको छ । समान १२ अंक रहेपनि नर्थ म्यासेडोनियाले रोमानियालाई गोल अन्तरमा पछि पार्दै दोस्रो स्थानमा रहेको छ । आइसल्यान्ड ५ अंक जोडेर पाँचौं स्थानमा रहँदा लिचेस्टाइन १ अंक जोडेर पुछारमा रहेको छ ।