एजेन्सी – कप्तान लुका मोड्रिचले खेलको अन्तिम समयतिर गोल गरेपछि क्रोएसिया फिफा विश्वकप कतार २०२२ को युरोपेली छनोटमा हारबाट जोगिएको छ ।

घरेलु मैदानमा क्रोएसिया खेलमा दुईपटक पछि परेपनि स्लोभाकियालाई २–२ गोलको बराबरीमा रोक्न सफल भएको हो । स्लोभाकियाका इभान श्रयन्स र लुकास हरसलिनले गोल गर्दा घरेलु टोलीका लागि एन्ड्रेज क्रामारिक र लुका मोड्रिचले बराबरी गोल फर्काए ।

खेलको २०औं मिनेटमा इभान श्रयन्सले गोल गर्दै स्लोभाकियालाई १–० को अग्रता दिलाए । उनले मारेक हाम्सिकको पासलाई सदुपयोग गरेका थिए । २५औं मिनेटमा एन्ड्रेज क्रामारिकले गोल गर्दै खेललाई १–१ गोलको बराबरीमा ल्याए । ४५औं मिनेटमा लुकास हरसलिनले गोल गरेपछि क्रोएसिया पहिलो हाफमा २–१ ले पछि पर्यो । उनले लाडिस्लाभ अलमासीको पासमा गोल गरेका थिए ।

७१औं मिनेटमा कप्तान लुका मोड्रिचले गोल गर्दै खेललाई २–२ गोलको बराबरीमा ल्याउँदै क्रोएसियालाई हारबाट जोगाए । यो बराबरीपछि समूह ‘एच’ मा क्रोएसिया ८ खेलबाट १७ अंक जोडेर दोस्रो स्थानमा झरेको छ । स्लोभाकिया १० अंक जोडेर तेस्रो स्थानमा रहेको छ ।

यही समूहको अर्काे खेलमा रसियाले स्लोभेनियालाई २–१ ले पराजित गर्दै शीर्षस्थानमा उक्लिएको छ । रसियाको जितमा इगोर डिभेव र जिओरजी डिजिकियाले गोल गरे । स्लोभेनियाका जोसिप इलिसिसले एक गोल फर्काए ।

यो जितसँगै रसिया ८ खेलबाट १९ अंक जोडेर शीर्षस्थानमा उक्लन सफल भएको हो । क्रोएसिया बराबरीमा रोकिएको फाइदा रसियालाई पुग्यो । पराजित स्लोभेनिया १० अंक जोडेर चौथो स्थानमा रहेको छ ।

यही समूहको अर्काे खेलमा साइप्रस र माल्टाले २–२ गोलको बराबरी खेल्दै अंक बाँडेका छन् । बराबरीपछि दुवै टोलीको समान८ खेलबाट समान ५ अंक रहँदा माल्टा गोलअन्तरमा पाँचौ स्थानमा रहँदा साइप्रस पुछारमा छ ।