एजेन्सी – साफ च्याम्पियनसिप २०२१ अन्तर्गत शनिबार हुने फाइनल खेलमा नेपाली राष्ट्रिय फुटबल टोलीले उपाधिका लागि भारतको सामना गर्दैछ । खेलअघि पत्रकार सम्मेलनमा सहायक प्रशिक्षक किरण श्रेष्ठ र कप्तान किरण चेम्जोङले टोलीको तयारीबारे बोलेका थिए ।

प्रशिक्षक श्रेष्ठले नेपालले भारतविरुद्ध पुरानो खेलबारे बिर्सेर नयाँ खेलका लागि तयारी गरिरहेको बताए । ‘ पहिलो खेलमा जे भयो, त्यो सकियो । अब हाम्रो सम्पूर्ण ध्यान भोलिको खेलमा छ । हामीले पुरानो नतिजाबारे सोचिरहेका छैनौं,’ उनले भने ।

श्रेष्ठले टोलीको तयारी राम्रो भइरहेको र खेल कठिन हुने बताए । ‘फाइनलको लागि राम्रो तयारी भइरहेको छ । हामीले पछिल्ला खेलमा गरेका गल्ति सच्याउनेछौं । खेल निकै कठिन हुनेछ । हामी आक्रमण र डिफेन्स दुवैमा राम्रो गर्नेछौं । भोलिको खेलमा निकै मिहिनेत गर्नेछौं,’ उनले भने, ‘पुजनको अवस्थाबारे भोली नै थाहा हुनेछ । आशा गरौं भोलीसम्म ठिक हुनेछन् ।’

कप्तान किरणले भने माल्दिभ्स आफ्नो दोस्रो घर रहेकाले स्थानीय समर्थकले नेपालको साथ दिने आशा देखाए । ‘माल्दिभ्स मेरो दोस्रो घर हो । यहाँ मैले दुई वर्ष टिसी स्पोर्ट्स क्लबका लागि खेलेको थिएँ । मलाई यहाँ धेरैले चिन्नुहुन्छ । यहाँ खेल्न पाउँदा खुसी लागेको छ र आशा छ भोली नेपालकै समर्थनमा आउनुहुनेछ । हामी भोली इतिहास रच्न खेल्नेछौं । भोली हामी गोर्खाली जसरि खेल्नेछौं र जितका लागि सबथोक दिन तयार छौं,’ उनले भने ।

किरणले पनि भारतविरुद्ध पुरानो नतिजाले केहि असर नगर्ने बताए । ‘हामीले पछिल्लो खेलबारे सोचेका छैनौं । हाम्रो लागि पुरानो नतिजा सकिसक्यो । भोली हाम्रो लागि ठूलो दिन हो । भोली जितको लागि हामी सबथोक दिनेछौं । हामी आक्रामक रुपमा अघि आउनेछौं र गोर्खाली पारामा खेल्नेछौं,’ उनले थपे ।

किरणले चोटका कारण फाइनल गुमाउने पक्का भएका भारतका फरवार्ड फारुख चौधरीका लागि पनि नेपाली टोलीको तर्फबाट चाडैं ठिक हुन शुभकामना दिए । ‘पछिल्लो खेलमा भारतका फरवार्ड फारुख चौधरीले चोट बोकेका थिए । हामी टोलीको तर्फबाट उनी छिट्टै ठिक हुन् भन्ने कामना गर्दछौं,’ कप्तान किरणले भने । भारतका मिडिया अफिसर निलान्जन दत्तले पनि टोलीको तर्फबाट धन्यवाद व्यक्त गर्दै फारुखसम्म संदेश पुर्याउने प्रतिवद्धता जनाए ।

यो पनि : फाइनलमा भारतका प्रशिक्षक स्टिमाच र दुई खेलाडी नहुने