काठमाडौं (हाम्रो खेलकुद) – ए डिभिजन लिगको तयारीका क्रममा रहेको मछिन्द्र क्लब र नेपाल पुलिस क्लबको मैत्रीपूर्ण खेल १-१ को बराबरीमा सकिएको छ ।

पुलिसका लागि रवी पासवानले गोल गर्दा मछिन्द्रका लागि देवेन्द्र तामाङले गोल गरे । साविक विजेता मछिन्द्र यस सिजन खेलाडी अनुबन्धनमा आक्रामक देखिएको छ । क्लबका लागि नुर्लान नोभ्रुजोभ, सादिग गुलिएभ र छिरिङ गुरुङले पहिलो खेल खेले । तीनै खेलाडी क्लबमा यसै सिजन अनुबन्धित भएका हुन् ।

त्यसअघि सातदोबाटोस्थित एन्फा कम्प्लेक्सको मैदानमा भएको मैत्रीपूर्ण खेलमा थ्री स्टारले मनाङ मर्स्याङ्दी क्लबलाई २-१ ले पराजित गरेको भयो । थ्री स्टारको जितमा विजय भुजेल र निशान खड्काले गोल गरेका थिए । मनाङका लागि ओलावाले आफिजले बराबरी गोल फर्काएका थिए ।

थ्री स्टारले विजयको गोलमा अग्रता लिएको थियो । तर थ्री स्टारको गोलरक्षक प्रिसोले गल्ति गर्न पुग्दा ओलावाले पहिलो हाफमा नै मनाङलाई बराबरीमा ल्याउन सफल भए । दोस्रो हाफमा निशानले गोल गर्दै जित पक्का गरे । उनले पेनाल्टी क्षेत्रको ठिक बाहिर प्राप्त फ्रिकिकलाई गोलमा परिणत गरेका थिए ।

दुवै टोली आफ्ना केहि मुख्य खेलाडीबिना नै मैदान उत्रिएका थिए । थ्री स्टारका प्रशिक्षक उज्जन श्रेष्ठ र मनाङका राजेन्द्र तामाङले नयाँ खेलाडीलाई पनि प्रयोग गरेका थिए ।

थ्री स्टारको लिग तयारीस्वरूप खेलिएको दोस्रो खेल हो । यसअघि क्लबले गत शुक्रबार न्यु रोड टिम (एनआरटी) सँग ३-३ को बराबरी खेलेको थियो । मनाङले भने पहिलो मैत्रीपूर्ण खेल खेलेको हो ।