काठमाडौं (हाम्रो खेलकुद) – पाँचौं ताम्रकार फुटसल प्रतियोगिता २०२२को उपाधी बि.के. सुनचाँदी पसलले जितेको छ । ताम्रकार समाजको युवा तथा खेलकुद उपसमितिको आयोजनामा भएको प्रतियोगिताको फाइनलमा बिकेले मेड्स मार्ट फार्मेसीलाई १–० गोलले पराजित गरेको थियो ।

सेमिफाइनलमा बिकेले ओरियन इलेक्ट्रीकललाई २–१ ले तथा मेड्स मार्ट फार्मेसीले आर्टस फेसन नेपाललाई टाइब्रेकरमा २–० ले हराउँदै फाइनलमा प्रवेश गरेका थिए । बिकेले गत सिजन फाइनलमा पराजित भएको पीडा उपाधि जित्दै बिर्सायो ।

विजेता तथा उपविजेता टिमलाई ललितपुर महानगरपालिकाका उपप्रमुख मञ्जली शाक्य “आस्था”, समाजका अध्यक्ष बिनोद ताम्रकार, द ब्रिटिस कलेजका प्रशासनिक प्रमुख अमरदीप मण्डल, उपसमितिका संयोजक अनिस ताम्रकार लगायतले ट्रफी, मेडल, प्रमाण पत्र तथा नगद पुरस्कार वितरण गरे । विजेताले रु ३०,०००।–तथा उपविजेताले रु १५,०००।– प्राप्त गरेका थिए ।

सोहीदिन भएको अण्डर १४ प्रतियोगिताको फाइनलमा प्रभु हिरोजले सिटी प्रिमिएर रेन्जर्सलाई ३–१ गोल अन्तरले पराजित गरी ट्रफी जित्यो । त्यहि दिन महिला खुल्ला, दशवर्ष मुनि तथा भेट्रान टिमको प्रदर्शनी खेलपनि भएको थियो । ताम्रकार अल स्टार र द ब्रिटिस कलेज बिचभएको मैत्रीपूर्ण खेलमा द ब्रिटिस कलेज ३–२ ले विजयी भयो ।

प्रतियोगिताको उत्कृष्ट गोलकिपरमा मेडस मार्ट फार्मेसीका बिक्सन ताम्रकार, उत्कृष्ट खेलाडीमा वि.के सुन चांदिका कुशल राजकर्णिकार, उच्चगोलकर्तामा बिकेका लिउसन राजकर्णिकार र मेडस मार्ट फार्मेसीका बादल शिल्पकारले संयुक्तरुपमा प्राप्त गरे । त्यस्तै प्रेसिडेन्ट च्वाइसमा मेडस मार्ट फार्मेसीका युसन ताम्रकार घोषित भएकाथिए । त्यस्तै अण्डर १४ को उत्कृष्ट खेलाडीमा प्रभु हिरोजका रेक्सन राजकर्णिकार भएका थिए ।