काठमाडौं (हाम्रो खेलकुद) – सामाजिक संजाल फेसबुकको चर्चित समूह मेन्स रुम रिलोडेडको फुटसल प्रतियोगिता ‘एमआरआर फुटसल २०७९’ माघको पहिलो साता नवलपुरमा हुने भएको छ ।

एमआरआर समूहका सदस्यहरु सहभागी हुने प्रतियोगिता नवलपुरको कावासोती फुटसलमा माघ ७ गते आयोजना हुनेछ । प्रतियोगितामा कुल १६ टोलीको सहभागिता रहनेछ । सहभागी टोलीमा एमएमआर समूहमा रहेका सदस्य खेलाडी हुनेछन् । प्रतियोगिताका लागि माघ ६ गते सम्पूर्ण खेलाडी र टोली नवलपुर पुग्ने तालिका रहेको छ ।

आयोजक समितिका प्रतिनिधि विकास शर्माले प्रतियोगिताका लागि तयारी अन्तिम चरणमा रहेको बताए । ‘हाम्रो तयारी अन्तिम चरणमा छ । नवलपुरको स्थानीय पर्यटनको प्रचार गर्न र भातृत्व अभिवृद्धि गर्नका लागि प्रतियोगिता आयोजना गरेका हौं । खेलकुदको माध्यमबाट एक आपसमा भाइचारा र सम्बन्ध बढाउने मुख्य लक्ष्य हो,’ शर्माले जानकारी दिए ।

प्रतियोगिताको मुख्य प्रायोजक एम्बिसन गुरु, सह प्रायोजक आवर क्लोजेट, सहयोगीमा जर्सी पसल नेपाल, फोनपे, आइटी पार्टनर द भ्यालु क्रु र इन्टरनेट पार्टनर सुबिसु छन् । प्रतियोगिताको मेडिकल पार्टनरमा शंकर पोलिक्लिनिक तथा मिडिया पार्टनरमा रुटिन अफ नेपाल बन्द, हाम्रो खेलकुद र डीटिएम मिडिया छन् ।