काठमाडौं (हाम्रो खेलकुद) – दारी ग्याङ फुट्सल प्रतियोगिता २०८१ को उपाधि भक्तपुरको प्रदीप एफसीले जितेको छ । परोपकारका लागि फुटसल भन्ने नाराका सहित दारी ग्याङद्वारा आयोजित प्रतियोगिताको फाइनलमा बनस्थलीको फुलमाया एफसीलाई पराजित गर्दै प्रदीप च्याम्पियन बनेको हो ।

फाइनल भिडन्तमा प्रदीपले फुलमायालाई ३-० ले हराउँदै उपाधि जित्न सफल भएको हो । विजयी टोलीका लागि सुदर्शन श्रेष्ठ, महेन्द्र कार्की र रितेश लामाले १-१ गोल गरे । फाइनल खेलको म्यान अफ द म्याच भने प्रदिप एफ सीका रितेश लामा घोषित भए ।

विजेता प्रदीप एफसीले ५० हजार रुपैयाँ हात पार्यो भने उपविजेता फुलमायाले ३० हजारमा चित्त बुझायो । प्रतियोगिताका सर्वोत्कृष्ट खेलाडी च्याम्पियन टोलीका सुदर्शन श्रेष्ठ चुनिए । उत्कृष्ट गोलरक्षकमा हाना दुलका राजकुमार आले तथा र सर्वाधिक गोलकर्ताले डिजी दिव्यान्शीका कविर तामाङले जनही ५-५ हजार रुपैयाँ प्राप्त गरे । विजयी खेलाडीहरुलाई पूर्व राष्ट्रिय खेलाडी उपेन्द्रमान सिंह र रेफ्री एसेसर सुरज सायमीले पुरस्कृत गरेका थिए ।

फुट्सल प्रतियोगितामा दारी ग्याङका विभिन्न जिल्लाहरु र समूहहरुबाट प्रतिनिधित्व गर्दै १२ टिम र अरु खुल्ला रुपमा सहभागी २० टिम गरि कुल ३२ टिमको सहभागीता रहेको थियो । पहिलो दिन लिग चरणका ३२ खेल भएका थिए भने दोस्रो तथा अन्तिम दिन नकआउट चरणका १५ खेल भएका थिए ।

विभिन्न सामाजिक कार्यहरुमा सक्रिय दारी ग्याङले यस प्रतियोगिताबाट बचत भएको रकम आगामी दिनमा परोपकारका कामहरु गर्ने आयोजक सदस्य महेश्वर घिमिरेले बताएका छन् ।