काठमाडौं (हाम्रो खेलकुद)- हिमालयन फुटबल क्लब
हिमालयन गानादा फुटसल गोल्ड कपको उपाधि रक्षा गर्न सफल भएको छ ।

चाबहिलस्थित भाटभटेनी हेल्थ क्लबमा शुक्रवार फाइनल ढुकु स्पोर्ट्स हवलाई पेनाल्टी सुटआउटमा ३-२ गोल पराजित गर्दै आयोजक हिमालयन एफसीले उपाधि रक्षा गरेको हो ।

निर्धारित २० मिनेटको समयमा १-१ गोलको बराबरी भएपछि खेल पेनाल्टी सुटआउटमा गएको थियो । उपाधिसँगै विजेताले २ लाख रुपैयाँ प्राप्त गर्यो । दोस्रो टोलीले १ लाख रुपैयाँ प्राप्त गर्यो ।

राष्ट्रिय फुटबल टोलीका पूर्व कप्तान हरि खड्का, महिला राष्ट्रिय टोलीका खेलाडीहरू अनिता बस्नेत, हिरा भुजेल, निशा थोकर र सविता राना मगरले‌ विजेता र उपविजेता टोलीलाई‌ पुरस्कृत गरेका थिए।

प्रतियोगितामा हिमालयन एफसीका दिपेश श्रेष्ठ उत्कृष्ट गोलकिपर चुनिए । गोलपोस्टको जिम्मा सम्हालेका दिपेशले प्रि-क्वाटरमा टिमको लागि दुई गोल गर्न सफल भएका थिए भए फाइनल खेलको पेनाल्टीमा पनि विजयी गोल उनले नै गरेका थिए । उनले नगद १० हजार रुपैयाँ प्राप्त गरे।

ढुकुका अशोक मगर उत्कृष्ट खेलाडी चुनिए र उनले
१० हजार रुपैयाँ प्राप्त गरे। मत्से फुटसल फेयरप्ले टिम घोषित भएको थियो। बागमती फुटबल संघका उपाध्यक्ष राजिव मानसिंह बस्नेतले फेयरप्ले टिमलाई नगद २० हजार र ट्रफी प्रदान गरे ।

राष्ट्रिय महिला टोलीका पूर्व प्रशिक्षक खड्काले सर्वाधिक धनराशीको गोल्डकप आयोजना गरेकोमा हिमालयन एफसीलाई बधाई दिए । उनले यस्ता प्रतियोगिताले युवा खेलाडीको प्रतिभा प्रस्फुटन र क्षमता अभिवृद्धिमा महत्वपूर्ण भुमिका खेल्ने बताए ।

आयोजक क्लबमा अध्यक्ष विनोद कार्कीले प्रतियोगिताका सहयोगीलाई‌ धन्यवाद भविष्यमा प्रतियोगिता आयोजना गर्न उर्जा मिलेको प्रदान बताए ।
दुई दिने प्रतियोगितामा ३२ टोलीको सहभागिता थियो ।प्रतियोगिता भदौ २० र २१ गरि दुई दिनसम्म चलेको थियो ।