काठमाडौं, साउन २८ गते । ग्लेसियर र पाटन ‘बी’ प्रथम क्रान्तिकारी कप अन्तरकलेज फुटसल प्रतियोगितामा बिहीबार सेमिफाइनलमा प्रवेश गरेका छन् ।
शान्तिनगरमा भएको खेलमा ग्लेसियरले काठमाडौं इन्जिनिएरिङ कलेज (केइसी) लाई ३–१ गोलले पराजित गर्यो । ग्लेसियरका करुणराज ढकालले ह्याट्रिक गरे । केइसीका सचेत लामिछानेले १ गोल फर्काए । पाटन ‘बी’ ले अस्कल ‘ए’ लाई ५–० गोलले हरायो । विजेताका मणि लामाले ह्याट्रिक गरे भने उशम केसी र शेरबहादुर थापाले १–१ गोल थपे ।
अखिल क्रान्तिकारी नेवा: राज्य समितिद्वारा आयोजित प्रतियोगितामा पब्लिक युथ क्याम्पस, पाटन ‘सी’, ओरियन्ट र क्यापिटल कलेज एन्ड रिसर्च सेन्टर (सीसीआरसी) क्वाटरफाइनलमा पुगे ।
पब्लिक युथले पुल्चोक इन्जिनिएरिङ कलेजलाई ४–२ गोलले पाखा लगायो । विजेताका साजन डंगोल, लक्ष्मण चौधरी, दीपक घिसिङ र सुबोध क्षेत्रीले १–१ गोल गरे । पुल्चोकबाट दुवै गौल युवराज लामाले आफ्नो नाममा लेखाए । पाटन ‘सी’ ले लिटिल एन्जल्सलाई टाइब्रेकरमा ४–३ ले निराश पार्यो ।
ओरियन्टले अस्कल ‘बी’ माथि ५–० को सहज जित रच्यो । ओरियन्टका पवन खड्काले २ तथा श्याम नेपाली, निरज परियार र युरोप भण्डारीले १–१ गोल गरे । टाइम्स विरुद्धको खेलमा सीसीआरसी ४–१ ले विजयी भयो । सीसीआरसीका सन्देश केसीले २ तथा क्षितिज सुवेदी र शितल बोहराले १–१ गोल गरे । टाइम्सका छिरिङ शेर्पाले सान्त्वना गोल गरे ।
क्वाटरफाइनलमा सीसीआरसीको भेट पाटन ‘सी’ संग हुनेछ भने पब्लिकले ओरियन्ट विरुद्ध प्रतिस्पर्धा गर्नेछ ।
प्रतियोगिता शुक्रबार सम्पन्न हुनेछ । विजेताले ६६ हजार, उपविजेताले ३३ र तेश्रो हुनेले २२ हजार नगद पुरस्कार हात पार्नेछन् ।
