काठमाडौं (हाम्रो खेलकुद) – नर्थ स्टार फुटबल एकेडेमीले आफ्नो स्थापनाको पहिलो वर्ष पूरा भएको अवसरमा एक कार्यक्रम आयोजना गर्दै प्रशिक्षार्थी खेलाडीलाई अवार्ड वितरण गरेको छ ।

एकेडेमीको वार्षिकोत्सव कार्यक्रममा बुढानिलकण्ठ नगरपालिका वडा नम्बर १० का अध्यक्ष नवराज भट्टराईसँगै राष्ट्रिय टोलीका पूर्वकप्तान विराज महर्जन, विकेश कुथु र अनन्त तामाङ उपस्थित रहेका थिए । विराटनगर सिटी एफसीका सोनाम घले पनि कार्यक्रममा उपस्थित थिए ।

वार्षिकोत्सव मनाउने क्रममा राष्ट्रिय खेलाडीले पनि एकेडेमीका खेलाडी र अभिभावकसँग मैत्रीपूर्ण खेल पनि खेलेका थिए ।

नर्थ स्टारले अन्तरिक अवार्ड पनि वितरण गरेको थियो । यू१० उमेर समूहमा राय्हन राई, यू१२ मा सफल तामाङ र यू१४ उमेर समूहमा क्रिस्टोफर तामाङ प्लेयर अफ द इयर घोषित भए ।

प्रशिक्षक विशाल श्रेष्ठले प्रशिक्षार्थीहरुको खेल कौशल मात्र नभएर अनुशासन, पछिल्लो एक वर्षको प्रगति र खेल भावनालाई मध्यनजर गर्दै अवार्ड प्रदान गरिएको बताए ।

काठमाडौंको बुढानिलकण्ठस्थित कपन स्पोर्ट्स सेन्टरमा अवस्थित एकेडेमीमा पछिल्लो एक वर्षयता झन्डै १ सय प्रशिक्षार्थीले साप्ताहिक प्रशिक्षण गरिरहेका छन् । राष्ट्रिय खेलाडी विशाल श्रेष्ठसँगै महेश श्रेष्ठ, कपिल ढकाल, मनिष पौडेल, जय प्रकाश बम्जन र रोशन कार्कीले खेलाडीलाई प्रशिक्षण दिँदै आएका छन् ।

प्रशिक्षक श्रेष्ठले आगामी दिनमा साताको ३ समय प्रशिक्षणका लागि तयारी भइरहेको जानकारी पनि दिए ।