काठमाडौं (हाम्रो खेलकुद)- सेन्ट जेभियर्सले ग्लोबल रिचले आफ्नो सातौं वार्षिकोत्सवको अवसरमा आयोजना गरेको अन्तर विद्यालय ए लेभल फुटसल प्रतियोगिताको उपाधि जितेको छ ।

धुकु फुटसलमा शनिवार भएको फाइनलमा सेन्ट जेभियर्सले प्रिमियर इन्टरनेशनल आईबी कन्टिन्युम स्कूललाई पेनाल्टी सुटआउटमा ४-३ ले पराजित गर्यो ।

निर्धारित ४० मिनेटको खेल १-१ गोलको बराबरीमा सकिएपछि निर्णय टाइब्रेकरबाट लिइएको थियो । प्रतियोगितामा उपत्यकाका १६ कलेजको सहभागिता थियो । ग्लोबल रिचले सामाजिक उत्तरदायित्व अन्तर्गत यो प्रतियोगिता आयोजना गरेको जनाएको छ।

प्रतियोगिताको उत्कृष्ट खेलाडी विजेता सेन्ट जेभिर्यसका आदित्य गैरे भए । त्यस्तै सर्वाधिक गोलकर्ताको उपाधि उपविजेता प्रिमियमका श्यामिर श्रेष्ठ, उत्कृष्ट गोलरक्षक पनि प्रिमियमकै रिलिश न्यौपाने घोषित हुँदा सेन्ट जेभियर्सका वेदान्त सिंह ठकुरी उत्कृष्ट प्रशिक्षक चुनिए।

सेन्ट जेभियर्सको सन्जोग राई प्लेयर अफ दि फाइनल घोषित भए । रातो बंगला स्कूलले फेयर प्ले अवार्ड जित्यो ।

प्रतियोगितामा अष्ट्रेलियाका युनिभर्सिटी अफ टेक्नोलोजी सिड्नी, बैंकक युनिभर्सिटी, कर्टिन युनिभर्सिटी, युनिभर्सिटी अफ क्यानबेरा, म्याक्वेर युनिभर्सिटी र अष्ट्रेलियन क्याथोलिक युनिभर्सिटीको सहप्रायोजन थियो ।

विजेतालाई नेपाली राष्ट्रिय महिला टोलीकी फरर्वाड रेखा पौडेलले पुरस्कार वितरण गरिन् ।