काठमाडौं (हाम्रो खेलकुद)- तेस्रो संस्करणको रुस्लान ओपन फुटसल प्रतियोगिता यही शनिबार हुने भएको छ । पेरिविङ्कल सर्भिसको आयोजनामा हुने तेस्रो संस्करणको रुस्लान ओपन फुटसल प्रतियोगिता शनिबार हुने आयोजकले पत्रकार सम्मेलनमार्फ जानकारी गराए ।

एकदिने फुटसल प्रतियोगितामा २४ देखि ३२ टोलीले सहभागिता जनाउने आयोजक पेरिविंकलका प्रमुख कार्यकारी अधिकृत (सिइओ) दिपेश घलेले जानकारी गराए । प्रतियोगिताको सबै खेलहरु लाजिम्पाटस्थित ढुकु फुटसल हबमा हुनेछ । प्रतियोगितामा यसपटक काठमाडौं बाहिरको चार टोलीले पनि सहभागिता जनाउने सिइओ घलेले जानकारी गराए ।

मोफसलबाट सहभागिता जनाउने टोलीमा पोखराबाट दुई, बुटवल र चितवनबाट समान एक–एक टोली रहेका छन् । हालसम्म पोखराबाट दुई र काठमाडौंबाट १५ टोलीले सहभगिता निश्चित गरेको छ । लिगकम नकआउटका आधारमा हुने प्रतियोगितामा ३२ टोली सहभागी भए सहभागी टोलीलाई आठ समूहमा विभाजन गरी हरेक समूहका शीर्ष दुई टोली क्वार्टरफाइनल प्रवेश गर्नेछन् ।

३२ भन्दा कम टोलीको सहभागिता भए हरेक समूहका शीर्ष दुई टोली क्वार्टर फाइनल प्रवेश गर्ने आयोजकले बताएको छ । प्रतियोगिताको विजेताले १ लाख ५० हजार, उप–विजेताले ८० हजार रुपैया प्राप्त गर्नेछन् । यस्तै सेमिफाइनलमा प्रवेश गर्ने दुई टोलीले समान ३५–३५ हजार प्राप्त गर्नेछन् ।

यसैगरी प्रतियोगितामा उत्कृष्ट हुने उत्कृष्ट गोलरक्षक, उत्कृष्ट खेलाडी, डिफेन्स र उच्च गोलकर्ता समान १५–१५ हजारबाट पुरस्कृत हुनेछ । प्रतियोगिताको अघिल्लो दुई संस्करण शंखमुल फुटसलले हात पार्दा सामाखुशी फुटसल र महेन्द्रश्वर क्लव क्रमश उपविजेता भएको थियो ।