काठमाडौं (हाम्रो खेलकुद) – ओलम्पिया कलेज र आइडियल कलेजले प्रथम अल्फा बिटा अन्तर कलेज फुटसल प्रतियोगिताको क्वार्टर फाइनलमा प्रवेश गरेका छन् ।

शंखमुलस्थित शंखमुल फुटसलमा बुधबारबाट सुरु भएको फुटसल प्रतियोगितामा ओलम्पिया र आइडियलले समूह ‘बी’ मा दोहोरो जित निकाल्दै क्वार्टरफाइनलमा स्थान सुरक्षित गरेका हुन् । ओलम्पियाले पहिलो खेलमा लिटिल एन्जल्सलाई ३–१ ले पराजित गर्दा दोस्रो खेलमा नामी कलेजलाई ४–० ले पराजित गर्‍यो ।

यस्तै पहिलो खेलमा नामी कलेजलाई ४–० ले पराजित गरेको आइडियलले दोस्रो खेलमा लिटिल एन्जल्सलाई ५–० को फराकिलो अन्तरले पराजित गर्‍यो । यी दुई टिमले बिहिबार समूह विजेताका लागि खेल्नेछ । दुवै कलेजको समान दुई खेलबाट ६ अंक छ । पराजित भएको लिटिल एन्जल्स र नामी कलेज प्रतियोगिताबाट बाहिरिएको छ ।

यस्तै अर्काे खेलमा समूह ‘ए’ को साइपाल एकेडेमी र समूह ‘सी’ को ह्वाइटहाउस कलेजले दोहोरो जित निकालेको छ । साइपालले पहिलो खेलमा लिभरपुलमाथि ४–२ को जित निकाल्दा दोस्रो खेलमा कान्जिरोवालाई ४–० ले पराजित गर्‍यो ।

ह्वाइटहाउसले ह्वाइटफिल्ड र इनसाइड भिजनलाई समान ४–१ को नतिजाले पराजित गर्‍यो । अन्य खेलमा लिभरपुलले युनिग्लोबलाई, कान्जिरोवाले युनिग्लोबलाई, इनसाइड भिजनले ब्रिटिस कलेजलाई पराजित गर्‍यो ।

प्रतियोगिता अन्तर्गत बिहिबार पनि समूह चरणको खेलहरु हुने प्रतियोगिता संयोजक तथा पूर्वराष्ट्रिय खेलाडी हरि खड्काले जानकारी गराए । प्रतियोगितामा राजधानीका विभिन्न १६ कलेजको सहभागिता रहेको थियो । १६ कलेजलाई ४ समूहमा विभाजन गरिएको छ ।

हरेक समूहका शीर्ष दुई टोली क्वार्टरफाइनलमा प्रवेश गर्नेछन् । प्रतियोगिताको विजेताले ट्रफीसहित १ लाख, दोस्रो हुनेले ६० हजार, तेस्रो हुने टोलीले ४० हजार रुपैयाँ प्राप्त गर्नेछन् । त्यस्तै प्रतियोगिताको क्वार्टरफाइनलबाट खेलको ‘म्यान अफ दी म्याच’ले १ हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडी र सर्वाधिक गोलकर्ताले समान १० हजार रुपैयाँ प्राप्त गर्नेछन् ।