काठमाडौं (हाम्रो खेलकुद) – राज महर्जनलाई निरन्तरता दिदै नेपाल फुटसल व्यवसायी संघको पहिलो साधारण सभा सम्पन्न भएको छ ।
शनिबार धन्ययन्तरी फुटसलमा भएको प्रथम वार्षिक साधरण सभाले तदर्थ समितिका राज महर्जनकै नेतृत्वमा १३ सदस्यीय नयाँ कार्य समिति चयन गरेको हो । संघको उपाध्यक्षमा हरि खड्का, महासचिवमा मदन कोइराला, सचिवमा राजन लाल महर्जन र कोषाध्यक्षमा सम्राट बुढोथोकी रहेका छन् । यस्तै सदस्यहरुमा रमेश अवाले, मुकुन्द सिंह, नवीन वीर बस्नेत, थम्मन भुषाल, नवाङ निमा लामा, मनसजन राजभण्डारी, योगेन्द्र राई र पविन कार्की रहेका छन् ।
संघले यसअघि नेपालमा पहिलोपटक फुटसल भित्र्याउने नवाङ निमा लामालाई सम्मानित गरेको थियो । साधरण सभाका संघका अध्यक्ष राज महर्जनले दुई वर्ष अघि जिल्ला प्रशासन कार्यलयले एक्कासी फुटसल बन्द गर्ने प्रयास गरेपछि फुटसल व्यवसायी संघको स्थापना भएको स्मरण गर्दै आगमी दिनमा संघले समाजलाई कुनै बाधा नपर्ने कार्य गर्दै जाने बताए ।
यसअघि साधारण सभाको उद्घाटन समारोहमा अखिल नेपाल फुटबल संघ (एन्फा) का अध्यक्ष नरेन्द्र श्रेष्ठ, फुटसल कमिटिका अध्यक्ष रमेश रायमाझी, काठमाडौं महानगरपालिका वडा नम्वर ४ का अध्यक्ष महेन्द्र विष्ट, नेपाल खेलकुद पत्रकार मञ्चका अध्यक्ष महेश आचार्यलगायतको उपस्थिति रहेको थियो ।
