काठमाडौं (हाम्रो खेलकुद) – राजधानीमा शनिबार सम्पन्न फ्लाइटेक महिला फुटसल प्रतियोगिताको उपाधि सियोल इन्स्टिट्युटले जितेको छ ।

सियोलले फाइनलमा पासाङ ल्हामु शेर्पा कलेजलाई २ गोलले पराजित गर्न सफल भएको हो । निर्धारित समय बराबरीमा सकिएपछि खेल अतिरिक्त समयमा पुगेको थियो । सियोलले सो समयमा दुई गोल गर्दै रोमाञ्चक जित हांसिल गरेको हो । सियोल र पासाङ ल्हामुका सबै खेलाडीलाई ट्रफी, मेडल र सर्टिफिकेट प्रदान गरिएको थियो ।

छहारी शिक्षा सदनकी सृष्टी लामा प्रतियोगिताको उत्कृष्ट खेलाडी चुनिइन् । त्यस्तै उपविजेता पासाङ ल्हामु कलेजकी सुनकला राई प्रतियोगिताको सर्वाधिक गोलकर्ता भइन् । ८ टिमको सहभागिता रहेको यस प्रतियोगिताको खेल समूह चरण, सेमिफाइनल र फाइनल गरी तीन चरणमा खेलिएका थिए ।

महिला सशक्तिकरण र लैंगिक समानतालाई मूलधारमा ल्याउने उद्देश्य बोकेको यस प्रतियोगिताको आयोजक विगत चार वर्षदेखि युवा सशक्तिकरणको क्षेत्रमा कार्यरत ‘युथ लेजेन्ड नेपाल’ रहेको थियो । प्रतियोगितालाई फ्लाइटेक इन्टरनेसनलले मुख्य प्रायोजन गरेको थियो भने रेड बुलले सहप्रायोजन गरेको थियो ।

प्रतियोगिताका इभेन्ट निर्देशक मोहन घिमिरेले विभिन्न क्षेत्रका महिलालाई एक साथ फुटसलमार्फत जोड्न पाउँदा खुशी लागेको बताए । यस प्रतियोगिताले निकै राम्रो प्रतिक्रिया पाएकाले भविष्यमा पनि यसलाई निरन्तरता दिने उनले जनाए ।